Шаһардың орталығы мен шет аймағын жалғап жатқан ұзынсонар Қорқыт ата көшесінің бойында гүлге оранған аумақтар жетерлік. Бұл көшедегі тұрғындардың өзі табиғатқа жанашырлық танытып, айналасын жасыл-желекпен көмкеріп, өзгеге үлгі болып жүр. Солардың бірі – Ыбрайхан Мұсабаев.

 Қашан да қоғамнан тыс қалмайтын Ыбрайхан Мұсабаев бүгінде зейнетке шықтым деп, қол қусырмай, экологиялық мәселелерді көтереді. Табиғат-Ананы аялауды жанына дағды еткен ол ауласын да гүлмен көмкеріп тастаған. Ең сүйікті ісі – гүл өсіру. Әсіресе Қызылорда өңірінде сирек кездесетін гүлдер мен ағаштарды жинап, жерсіндіруге ерекше қызығушылық танытады. Бұл істі ол 2012 жылдан бері тұрақты түрде қолға алған. Бүгінде үйінде 37 түрлі гүл өсіп тұр. Айтуынша, гүл өсіру тек су құйып, баптаумен шектелмейді. Әр өсімдікке ықыласпен мейірім керек.

– Гүл де тіршілік иесі секілді оны жақсы көріп қарасақ жайқалып өседі. Ерекше күтім керек. Тіпті өзі еккен өсімдіктермен сырласатын адамдар да бар. Мына гүлдердің көпшілігі сырттан әкелінген. Сыр табиғатына үйреніп, жерсініп, айналаға әсемдік сыйлап тұр, – дейді ол.

Иә, расында ол кейбір ерекше гүлдерді шетелден арнайы алдыртады. Әсіресе Африкадан әкелінген өсемдіктер ыстықты жақсы көреді әрі күнделікті күтімді қажет етеді. Соған қарамастан табиғатқа деген сүйіспеншілігі оны ешқашан жалықтырмаған. Табиғатқа деген қызығушылығы туған жеріндегі ағаштар мен гүлдерді көріп, өскен кезден басталғанын айтады. Қазір өсіріп жүрген гүлдерінің көбі Қызылорда климаттына бейімделген, төзімді өсімдіктер.

Ыбрайхан Мұсабаев тек гүл өсірумен шектелмейді. Ол ұзақ жылдар бойына облыстың бас шаһарындағы қоғамдық істерге атсалысып, қалалық мәслихат депутаты болды. Ол осы халық қалаулысы болып жүргенде де Қызылорданың түкпір-түкпіріне әріптестерімен бірге терек ағашын отырғызған.

Өз еңбегі жайлы айта бермейтін ол қарапайым болмысын жоғары қояды. Дегенмен, еңбегінің жемісі шетелдерге дейін жеткен. Оның өсірген гүлдері Лондон, Париж, Тайланд, Вьетнам, Малазия, Гонконг секілді елдерге таралған.

– Ең бастысы елге пайдам тисе болды, – деді ол.

Бүгінде Ыбрайхан ағаның ісі көпшілікке үлгі. Табиғатты аялау туған жерді көркейту секілді қарапайым істердің өзі үлкен жанашырлықтан басталатынын оның еңбегінен анық байқауға болады.

Табиғат-Ананың тілін ұғып, жан сырын түсіне білетін жанның жүрек төріндегі ең ұлы мақсаты – елге қызмет ету. Біз оның әрбір сөзінен елдік мүдде ұғымын түйсініп тұрдық.

Бағым ЖАЛҒАСБЕКҚЫЗЫ,
Анар БОРАНБАЙ