Сырдария ауданы – аймақтағы алдыңғы қатарлы аудан. Облыс бойынша сан мәрте жүлдегер атанып, абыройы асып келеді. Халқының басым көпшілігі егін, мал шаруашылығымен айналысатын өңірде межелі мақсаттар көп. Аудан әкімі Берік Сәрменбаевпен сұхбатта біз оған көз жеткіздік.

 – Берік Әбдіғаппарұлы, ашықтықты халық жоғары бағалайды ғой. Сіз қаншалықты ашықсыз? Халықпен тікелей байланыстасыз ба?

– Осы ауданда еңбек еткеннен кейін халықпен тікелей кездесіп, халықтың ұсыныс-пікірлерін тыңдап, мәселесін шешу – біздің басты міндетіміз. Елдің жағдайын жақсарту үшін алдымен, мәселені өз көзіңмен көруің керек. Халық ұсыныс-пікір дегенде аспандағы айды сұрамайды, шын қажетін айтады. Өзінің үйіне қажетін емес, елге керектіні айтады. Кездесулерде «Ауылға не керек?» деп, өзім де сұрап жатамын. Жол, су, балалар ойыны тәрізді мәселелерді көп айтады. Мүмкіндігінше, демеушілік арқылы шешіп беруге тырысамыз. Айтылған ұсыныс-пікірлерді сараптап, алдағы жоспарға тұрақты енгізіп отырамыз.

– Халықпен тіке байланысыңыз орынды екен. Әкімнің күн тәртібін айтыңызшы.

– Таңертең 8 болмай жұмыста отырамын. Неге дейсіз бе? Өйткені, алдын ала жоспарымды сызуым керек. Әріптестеріме берген тапсырмаларымды тиянақтаймын. Оның қаншалықты орындалғанына мән беремін. Қандай мәселені шешу керек, күн ұзатпай шешерлік қандай іс бар, оның барлығын реттеймін. Қандай нысандарға барамын, оны да әуелі реттеп аламын. Өйткені, жоспарсыз жұмыста жүйе болмайды. Ал халыққа қатысты аптасына бір мәрте жеке қабылдауым бар.

 – Ауданда бұрын әкімнің орынбасары болдыңыз. Қазір өзіңіз аудан әкімісіз. Әкім болғалы мына жұмысты атқардым деп өзіңізге көңіліңіз толатын қандай істі атар едіңіз?

Ең бірінші халықтың ұсыныс-пікірі арқылы болады бәрі. Елге не керек деген сауалға жауап іздедім. Содан кейін тағзым алаңының көнерген келбеті жаныма бататын. Осыдан он үш жылдай бұрын салынған екен. Ішіндегі жаяу жүргіншілер жолы да сауырға қамшы басатындай болып тұрды. Кіреберістегі үйлердің ауласы келген мейманның ұнжырғасын түсіретіндей жағдайда болатын. Тұрғын үйлердің қасбеттері де көңіл құлазытатын. Міне, осы мәселелерді қолға алдық. Кіреберіске аллея салу, көркейту-көгалдандыру тәрізді іргелі жұмыстар атқарылды. Айтпақшы, біздің аудан мен Қызылорданың, сонан соң Жалағаштың арасындағы жол бойы өткен-кеткеннің көз алдында. Оны да көгалдандырып, көз сүйсінерліктей еттік. Жасыл-желекті көбейтсек, көлеңке де болады, халық тынығатын саябақ та болады…

– Бюджеттен бір тиын алмай, атқаратын жұмыстар болады. Ондай шаруалар бар ма?

– Ондай жұмыстар жетерлік. Өткен жылдың өзінде Бесарық ауылында сол ауылдың шаруашылығы зор жұмыс істеді. Өзін-өзі жұмыспен қамту мақсатында «Ауыл аманаты» тәрізді басқа да бағдарламалар арқылы беріліп жатқан несиелер бар ғой. Кейбіреулер мысалы өзінің үйінен кәсібін ашайын десе, оның ғимараты сәйкес келмей қалады. Тағы бірінде жер телімі, ғимарат болмайды. Осыған байланысты «Абай-Дәулет» шаруашылығы ауылдан сондай кәсіпкерлерге арнап ғимарат салды. Ондағылар ешқандай аренда төлемейді. Осы күні он екі кәсіпкер жұмыс істеуде. Мұндай бастама Ақжарма ауылында да қолға алынуда. Наурыз, сәуір айларында құрылысы басталады. Нағи Ілиясов ауылында Абзал Ералиев ағамыз ауылына жанашырлық танытып, жайқалтып қойды. Өткен жылы субұрқақ, «Еңбек» аллеясын ашты. Одан бөлек, мектептер мен балабақшаларға да қомақты үлес қосуда.

– Мұнайға иек артпай, қосымша кіріс көздерін қарау көптен бері айтылып келе жатыр. Бұл бағытта қандай бастамалар бар?

– Аймақ басшысының қолдауымен, біздің ауданнан бу газ қондырғысы салынғалы жатыр. Оңтүстік өңірлерде электр энергиясының тапшылығын болдырмау мақсатында қолға алынған бұл инвестициялық жобаның құны – 800 млрд теңге. Бұл мақсатта 270 гектар жер бөлінді. Бұл жоба тек ауданның ғана емес, аймақтың экономикасына ықпал етеді. Тек өзімізге қажетті электр энергиясын өндірумен шектелмей, сыртқа да сататын жағдайға жетеміз. Мұнан бөлек, тағы да 14 млрд теңгенің инвестициялық жобасы бар. Бұл бағытта да тиісті жұмыстар атқарылуда.

– Газ туралы айтып қалдық қой. Қазір елді мекендерге газ құбырын тарту қай деңгейде жүріп жатыр?

– Газдандыру жұмысы 45 пайыз көрсеткіште тұр. Қазіргі таңда Шаған және Нағи Ілиясов ауылдарына 3,1 млрд теңгеге газ құбырын тарту жұмыстары жүруде. Өткен жылы 1 млрд теңгеге Сәкен Сейфуллин және Асқар Тоқмағамбетов ауылдары «көгілдір отынға» қосылды.

– Халықты тұрғын үймен қамтамасыз ету мәселесіне байланысты не айтар едіңіз?

– Осы екі жарым жылдың ішінде біз 264 пәтер табыстадық. Бұл жерде халықтың әлеуметтік аз қамтылған осал топтарына ғана. Алдыңғы жылдары үш қабатты тұрғын үйден 18 пәтер алып берсек, қазір жаңа бағдарлама бойынша 30 пәтер бердік. Мемлекет басшысының қолдауын халық сезініп жүр. Қазір біз 2023 жылдың кезегін толық бітірдік. Енді 2024 жылы кезекке тұрғандар қалды. Қазір кезекте 115-тей адам бар.

– Кенттің ауқымы кеңейіп жатыр екен. Кіреберістегі жаңа мөлтек аудан да сәнімізді кіргізіп тұрған сыңайлы…

– Оның бәрін бас жоспарға сәйкес жасап жатырмыз. Толық инфрақұрылымын жеткізіп барып, жер бердік. Қазір барлық қажеттіліктермен қамтылған. Байқасаңыз, біз қазір Жалағашқа қарай бет алдық. Кеңейіп жатырмыз.

– Уақыт тауып, сұхбат бергеніңізге рахмет.

Әңгімелескен Дәулет ҚЫРДАН