Құрақтың Досжаны, Сырдың Сәбирасы, кеше ғана туған жерге тағзым жасап, сәлем бере келген Жеңіс Ысқақованы бесігінде әлдилеген Сырдарияның тағы бір топ перзенті халықаралық өнер бәйгесінен топ жарды. Алматы қаласында өткен XXVIII Халықаралық «Бозторғай» балалар шығармашылығы байқауында Сырдария ауданының жас таланттары аймақтың ғана емес, байтақ республиканың даңқын асырды.

 Өнер аламанында Нағи Ілиясов ауылдық мәдениет үйі жанындағы «Әуен бағы» ән үйірмесінің өнерпазы Нұрай Марат вокал жанры бойынша жүлделі І орынды иеленді. Дәл осы тұғырдан аудандық мәдениет үйі жанындағы «Балауса» халықтық би ансамблі де көрініп, І орынның биігін бағындырды.

Халықтық аспапта ойнау номинациясында Айдарлы ауылынан қатысқан Дәулетхан Көзейбай жүлделі ІІ орынды еншілеп, Сыр өнерінің ұлықтығын байқатты.

– Жыл сайынғы дәстүрлі өтетін байқау. Алдымен іріктеуді ауылдан бастадық. Кейін аудан, облыс деңгейінде өткіздік. Әлемнің бес мемлекетінен, атап айтқанда, Болгария, Армения, Украина, Қытай және Италиядан қатысушылар келді. Әрине, оңай болған жоқ. Менің шәкіртім Нұрайға келсек, ол үлкен топта өнер көрсетті. Ол топта өнерді жанына серік еткен отыз қатысушы болды. Үздіксіз еңбек етудің нәтижесінде осындай жетістікке жеттік. Қазылар алқасының құрамында Әміре мен Нағима Есқалиева болды, шетелдіктер де төрелік етті, – дейді Нағи Ілиясов ауылдық мәдениет үйінің директоры Нұрбол Тұранов.

Нұрай Марат қазір 9-сыныпты бітірді. Алдағы уақытта арнайы музыкалық білім алуды мақсатына айналдырған. Ұстаздары оның өнерден алыстамауына барынша қолдау көрсетіп келеді.

– Әрине, біз Нұрайдан мықты әнші шығып, қазақ өнерін биікке шығаруына барынша атсалысамыз. Оны өнерге бесінші сыныптан бастап баулып келемін. Ал алтыншы сыныбында Нұрай «Таңшолпан» телевизиялық жобасында ІІІ орынды иеленген болатын. Ә дегеннен өзінің мықтылығын танытқан қарлығашымызға алдағы уақытта да қолдау көрсете береміз. Шәкірттің шыққан шыңы ұстаз еңбегінің көрінісі болса, Нұрай сол еңбегімізді әлдеқашан көрсетті, – дейді Нұрбол Мұхтарұлы.

Бұл жетістіктер – жас өнерпаздардың таланты мен табанды еңбегінің, сондай-ақ олардың жетекшілерінің кәсіби шеберлігі мен тынымсыз ізденісінің жемісі. Жас таланттардың қанатын қатайтып, өнерге баулып жүрген ұстаздардың еңбегі әрдайым құрметке лайық.

Сонымен қатар, балаларының өнерге деген сүйіспеншілігін қолдап, олардың жан-жақты дамуына жағдай жасап жүрген ата-аналардың да еңбегі ерен. Бала жетістігі – отбасы тәрбиесі мен ұстаз еңбегінің ортақ жеңісі.

Сырдарияның дарынды жастары алдағы уақытта да ауданымыздың абыройын асқақтатып, жаңа белестерді бағындыра беретініне сенім мол.