Қазалы ауданында диқандардың ерен еңбегі байқалып тұр. Сырдария, Жалағаш тәрізді күрішті өңірлермен салыстырғанда мұнда бақша егу ісі жолға қойылған. Елді мекендер тұрғындары бірігіп, бір жеңнен қол, бір жағадан бас шығарып, өздеріне қажеттіні Жер-Анадан теріп отыр.
Қазалы қаласы тұрғындарының қаланың Қарлан беткейіндегі ұжымдық бақша егу жұмыстары көш басында. Мұнда тұрғындар бірігіп 2 гектар жерге қауын-қарбыз, 1 гектарға картоп және 3 гектарға көкөніс еккен.
Дәл осындай қадамнан Ү.Түктібаев ауылының тұрғындары да қашық емес. Олар да ұжымдық бақша егуді қолға алған. Ауылдық округтегі Қостам учаскесінде 18 адам бірігіп 10 гектар жерге, ал Қасқа учаскесінде 13 адам бірігіп 10 гектар жерге картоп, көкөніс және бақша дақылдарын еккен.
Аудан әкімі Алмасбек Есмаханов шаруалардың жұмысын көріп, оң бағасын берді. Ол Майдакөл ауылы маңындағы бақшалық жұмыстарымен де танысты. Ауыл сыртындағы Құлпыбай учаскесінде ауыл тұрғыны Алмасбек Наукеев жалпы 3,5 гектар жерді игеріп, оның 2 гектарына қауын-қарбыз, 0,5 гектарына картоп пен көкөніс, 1 гектарына жоңышқа орналастырған.
Бақшалықтарды аралау барысында аудан басшысы «Агро Өркен» ЖШС-нің егіс алқабын да көрді. Серіктестік биыл 465 гектар жерге күріш, 100 гектарға бидай, 50 гектарға мақсары, 297 гектарға жаңа жоңышқа және 623 гектарға ескі жоңышқа орналастырған.
Жалпы биыл аудан бойынша 224 гектарға картоп, 951 гектарға көкөніс, 1118 гектарға бақша дақылдары егілсе, негізгі дақыл – күріш 2447 гектар жерге орналастырылды.
Егістік алқаптарын аралау барысында аудан әкімі бау-бақша шаруашылығының азық-түлік қауіпсіздігін қамтамасыз етудегі маңызын атап өтті. Сонымен қатар, тұрғындардың көптеп бірігіп бақша егумен айналысуы нарықтағы азық-түлік бағасын тұрақтандыруға оң әсер ететінін жеткізді.
Аудан басшысы тиісті сала жетекшілері мен ауылдық округ әкімдеріне бау-бақша егумен айналысатын тұрғындарды қажетті ағын сумен уақытылы қамтамасыз етуді тапсырды.
Бүгінде бақша өнімдерінің алғашқы легі пісіп, сатылымға шығарылуда. Бұл – диқандардың маңдай тері мен тынымсыз еңбегінің нәтижесі. Берекелі еңбек пен бірліктің арқасында аудан тұрғындарының ырысы арта түспек.