Аудан әкімінің тапсырмасына сәйкес және тұрғындар тарапынан түскен өтініштер негізінде аудан әкімінің орынбасары Диас Молдабаев Тәуелсіздік ықшам ауданындағы жол қозғалысы қауіпсіздігі мен қоғамдық тәртіп жағдайына зерделеу жұмыстарын жүргізді.

Шараға аудан әкімдігі қызметкерлері, Жосалы кенті әкімінің орынбасары және аудандық полиция бөлімі қызметкерлері бірлесіп, аудан аумағындағы жаяу жүргіншілердің қауіпсіздігі, көлік қозғалысы және жалпы қоғамдық қауіпсіздік мәселелеріне мониторинг жасады.

– Қазақта бір керемет сөз бар. «Тәртіпсіз ел болмайды, тәртіпке бас иген құл болмайды» деген. Батыр Бауыржан атамыз ел болу үшін осындай қадам болуы керегін баса айтқан. Елге қызмет етіп жүрген саладамыз, еңбегіміз ел игілігі жолында болсын. Халық өзін қауіпсіз сезінуі керек. Қандай да болсын, тәртіп бұзғандар жауапкершіліктен қаша алмайды. Біз бұл бағытта қарқынды жұмыс істейміз, – деді аудан әкімінің орынбасары Диас Молдабаев.

Аралау барысында анықталған мәселелер бойынша тиісті мекемелерге бірнеше тапсырмалар беріліп, жол қауіпсіздігін күшейту шараларын жүйелі түрде жүргізу қажеттігі ескертілді. Мұндай іс-шаралар Қармақшы ауданында тұрақты жүргізіліп тұрады.

Қармақшы ауданы әкімінің баспасөз қызметі