Аудан әкімінің тапсырмасымен Қармақшы ауданы әкімдігі, аудандық прокуратура, аудандық полиция бөлімі, аудандық білім бөлімі және мекеме басшыларының қатысуымен «Заң мен тәртіп» қағидаты аясында жасөспірімдер арасында жиі орын алатын құқықбұзушылықтардың алдын алу мақсатында түнгі рейд жұмыстары жүргізілді.
Жасөспірімдердің қауіпсіздігін қамтамасыз ету мақсатындағы рейдтік іс-шаралар аудан көлемінде тұрақты түрде ұйымдастырылуда. Бұл рейд жұмыстары ауданға қарасты барлық кент және ауылдық округтерде жүргізіліп, саябақтар, дүкендер, компьютерлік клубтар, аллеялар және жастар көп шоғырланатын басқа да орындар араланды. Сонымен қатар кәмелетке толмаған жасөспірімдерге түсіндірме жұмыстары жүргізілді.
– Мұндай іс-шара тұрақты түрде өткізіліп тұрады. Заңнан аттамай, елдің ертеңін ойлайтын ұрпақты қалыптастыру – біздің міндетіміз, – дейді ұйымдастырушылар.
Сондай-ақ Қазақстан Республикасының заңнамасына сәйкес кәмелетке толмағандардың түнгі сағат 23:00-ден кейін заңды өкілдерінсіз көшеде немесе ойын-сауық орындарында жүруіне тыйым салынатыны жөнінде ескертулер берілді.
Айта кетсек рейд барысында «Таза Қазақстан» экологиялық акциясы аясында қоршаған ортаның тазалығын сақтау және табиғатты аялау жөнінде де түсіндіру жұмыстары қатар жүргізілді.
Қармақшы ауданы әкімінің баспасөз қызметі