Әлеуметтік желіде Ш.Қалдаяқов пен Қорқыт ата көшелерінің қиылысындағы жол жөндеу жұмыстарының сапасы бойынша тұрғындар тарапынан мәселе көтерілген болатын. Аталған аумаққа мамандар зерделеу жүргізіп, мердігер мекемеге жол жиектеріндегі тиісті талаптардың сақталуын міндеттеді.

Ерекше атап өту қажет, бұл көшені жөндеу жұмыстары әлі толық аяқталмаған. Яғни, жоспарлы шаруаның мерзімі бар. Мердігер «Қызылорда жолдары» компаниясы қажетті шараларды нормативтік талаптарға сай жүргізуде. Қадағалаушы мекеме күнделікті жұмыс барысын қадағалап отыр.

Сондай-ақ, желі арқылы мәселе көтерген қала тұрғыны Айнұр Тәуіпбаева да жол мәселесіне назар салуды сұраған. Ол «З.Шүкіров көшесіне тротуар салып берсінші. Тұрғындар тарапынан жазып та, айтып та жатырмыз. Ешқандай нәтиже жоқ. Қар, жаңбырлы күндері асфальт көл болады. Тұрғындар ЧС мамандарын шақыртып суын тартқызады. Қашанғы осылай жалғасады екен?!», – деп мәселені төтесінен қойған.

Ал Қызылорда тұрғын үй-коммуналдық шаруашылығы бөлімі бұл мәселеге орай: «З.Шүкіров көшесі жаяу жүргіншілер жолын салуды қажет етілетін көшелер тізіміне енгізілді. Осыған сәйкес жоба-сметалық құжаттары әзірленіп, бюджеттік ұсыныс жолданатын болады. Қажетті қаражат көзі қаралғаннан кейін тиісті жұмыстар кезең-кезеңімен атқарылатын болады» деп жауап қайырды.