Биыл Сырдария ауданында су үнемдеудің жан-жақты қадамдары қолға алынды. Нәтижесінде шаруалар су тапшылығын сезініп жатқан жоқ. Ауданға қарасты шаруашылықтар тиімді тетіктерін де тапқан.

Биыл Сырдарияда 32 473 гектар жерге ауыл шаруашылығы дақылдары орналастырылды. Оның ішінде, күріш 18 541 гектарға егілді. Өткен жылы күріштің көлемі 19 950 гектар болған.

– Биыл шаруашылық құрылымдары заманауи лазерлік жер тегістегіш техникасымен 4000 гектар жерге лазерьлік тегістеу жұмыстарын жүргізді Өткен жылы 3500 гектар жерді тегістеген еді. Нәтижесінде, ауданда тегістеу жұмыстары 80 пайыздан асты. Атыздың тегіс болуы судың біркелкі басуына және үнемделуіне сеп болады, – деді Б.Сәрменбаев.

Аудан бойынша аяқсу шығынын азайту мақсатында канал ішін бетондау үшін шаруашылықтардың демеушілігімен 7 каналға (Ақжарма, ЛМК-18В-2, ЛМК-14, Қосарық, Аңламас, ЛМК-8А, Елтай) жобалық-сметалық құжаттар әзірленіп, мемлекеттік сараптамадан өтуде. Болжаммен 15,8 млрд. теңгені құрайтын жобалар бойынша 95 шақырым каналдың іші бетондалады деп күтілуде.

Ауданда биыл қашыртқылар, каналдарды тазалау, гидротехникалық құрылыстарды жөндеу жұмыстары бойынша ішкі су жолдарынан 52 шақырым (100,0%) топырақ шығарылып, 13 дана (100,0%) гидротехникалық құрылыс, 48 дана (100,0%) су тартатын қондырғылар жөнделді.