Тазалық – тек сенбіліктің ғана жемісі емес. Ол – жүйелі жұмыс пен тұрақты процесстен туған іс. Бүгінде қала тазалығы әркез бақылауда тұр. Осыған орай шаһар басшысы Нұржан Ахатов сенбілік барысын көріп, аумақтарда атқарылып жұмыстарға зерделеу жүргізді.

Аралауда аулалардың абаттандырылуы, санитарлық тазалықтың сақталуы, қоғамдық орындардың жай-күйі және тұрғындарға қолайлы орта қалыптастыру бағытындағы шаралар назарға алынды. Аулаларға жақын орналасқан жол белгілері де назардан тыс қалмады.

Нұржан Сәбитұлы жауапты сала басшыларына қала аумағындағы тазалық пен тәртіпті қамтамасыз ету жұмыстарын күшейтуді тапсырды. Әсіресе, тұрғын үйлердің аулаларын абаттандыруға, қоқыстан тазартуға, көгалдандыруды ретке келтіруге және ортақ пайдаланылатын аумақтардың санитарлық жағдайын жақсартуға күш салуды міндеттеді.

Сондай-ақ,тұрғындардың ұсыныс-пікірлерін ескеру маңызды екендігін айтты. Бүгінде жауапты тұлғалар тұрғындардың ұсыныс-пікірлерін тыңдап, ортақ істе мәселені шешудің тиімді тетіктерін қарастыруда.

Дей тұрғанмен, бүгінгі таңдағы шаһар тазалығының жағдайы өзге қалалармен салыстырғанда көш ілгері. Алдағы уақытта бұл нәтиже жоғарылай түсері анық. Ал бақылау да тұрақты бола бермек.