Бір емес, үш бірдей елді мекенді біріктірген Қызылөзек ауылдық округіне қай кезде барсаңыз да, тынымсыз тірліктің куәсі боласыз. Мұнда күннің аптап ыстығына қарамастан жұмыс қызу. Бүгінде ауылда «Таза Қазақстан» экологиялық акциясы аясында ауыз толтырып айтарлықтай шаруа атқарылған. Үлкен жолдан бөлініп, өз алдына бағыты бар елді мекенге апаратын жолдың бойында да тазалық бірінші орынға қойылыпты.
– Бұл – үлкен ауыл. Қараөзек, Айнакөл елді мекендері мен Қараөзек бекетін қосқанда 627 отбасы тұрады. Халық саны 3505 адамға жеткен. Міне, осындай үлкен ауылдың тазалығын қамтамасыз ету үшін біз бар күш-жігерімізді салып келеміз. Әрине, жұмыстың бағыты тек тазалық емес қой, осы істі тасада қалдырмай, біраз шаруаны атқарып жүрміз.
Ауылдық округке қарасты үш елді мекенде жыл сайын «Таза Қазақстан» экологиялық акциясы аясында санитарлық тазарту, көркейту және көгалдандыру іс-шараларын жүргізу күн тәртібінен түспей, өз жалғасын тауып келеді. Акцияның негізгі мақсаты – қоршаған ортаны қорғау, елді мекендердің санитарлық жағдайын жақсарту және тұрғындардың экологиялық мәдениетін қалыптастыру болып табылады. Аталған акцияға меншік нысанына қарамастан барлық мекеме, ұйым, кәсіпорындар мен тұрғындар жұмылдырылуда, – дейді ауыл әкімі Сәкен Әбдіжаппар.
Сәкен Нысанұлының айтуынша, жыл басында мердігер «RayForcе» ЖШС мекемесімен келісім-шарт жасалып, шарт бойынша елді мекен көшелеріндегі тұрмыстық қалдықтарды жинап Қызылорда қаласындағы арнайы полигонға жеткізуді қамтамасыз етіп отырады. Сонымен қатар, үш елді мекеннен барлығы 17 азамат қоғамдық ақылы жұмысқа қабылданып күнделікті тазалық жұмыстарымен айналысуда.
– Істеген ісімізге көңіліміз толады. Сырлап, әктеп кеткен нысанға екінші өмір сыйлағандай сезінесің. 4-5 жылдан бері қоғамдық негізде жұмыс істеймін. Жұмысыңның нәтижесі өзіңнің осы қоғамдағы орның бар екенін көрсетеді. Қоғамдық ақылы жұмыс дегеніңіз жақсы ғой. Халық елдің ішінен нәпақасын табады. Жұмыссыздар азаяды, – дейді Гүлназ есімді ауыл тұрғыны.
Қоғамдық ақылы қызметтен бөлек, ауыл халқының да сенбілік жұмыстарының себі тиюде. Өзі тазалаған жерді ешкім қайта шашқысы жоқ. Демек, сенбіліктің тазалық жұмысынан бөлек, адамды өзін тәрбиелеуге бағыттайтын процесс.
– «Таза Қазақстан» экологиялық акциясы барысында әрбір сенбі сайын сенбіліктер ұйымдастырылып, ауылдың көшелері, тағзым, демалыс алаңдар, әлеуметтік және кәсіпкерлік нысандар ғимараттарының маңы тұрмыстық қоқыстардан тазартылып, шөптері шабылды. Елді мекенге кіреберістегі 12 шақырым жолдың бойы қоқыстардан күнделікті тазартылып отыр. Елді мекендердің көшелерінде орналасқан талдар ай сайын әктеліп, электр және түнгі жарық бағаналары, билборд бағаналары, жол белгілері, екі автомобиль көпірі мен алты аялдамаға және ауылдық округке кіре берістегі орналасқан паспортқа сырлау, әрлеу жұмыстары жүргізілді. Мұның барлығы жұмыла жүк көтергеніміздің арқасы, – дейді ауыл әкімі.
Саялы ағаш күтімді қажет етеді. Мерзімі келіп, қураған бұтақтарын қырқып, кесіп отырмаса, ұсқыны қашады. Жол бойын саялы ағашқа айналдырған ауылда бұл іс жүйелі жүргізіліп келеді. Оның үстіне, аяқсудың кедергіге тап болмай, межелі жерге жетіп, елдің кәдесіне асуы үшін үш шақырым арық тазаланып, судың жолы ашылған. Әлеуметтік нысандар аулалары мен «Тағзым алаңы» аумағына бес жүз түп көктемгі ағаш көшеттері отырғызылды. Ал балалардың қауіпсіздігін қамтамасыз ету мақсатында үш мектептің жанындағы жол белгілері жаңаланып, «жаяу жүргіншілер жолы» таңбалары қайта сызылды.
– «Таза Қазақстан» – тек тазалықты ғана емес, көп нәрсенің жүйелі жұмыс істеп, жолға қойылғанын мақсат ететін шара. Біз осы бастама аясында үш елді мекендегі алты балалар ойын және спорт алаңдарына ағымдағы жөндеу жүргізіліп, сырлап алдық. Ауылдардың аумағындағы тарихи ескерткіштер, мәселен, Сауранбай көпірі, ауыз су мұнарасы, ескі Вокзал ғимараты, теміржол көпірі мен қорымдардың айналасы тазартылып, шөптері шабылды. «Таза Қазақстан» акциясы аясында ауылдық учаскелік полиция инспекторларымен бірлесе қоғамдық тәртіпті қамтамасыз ету және экологиялық мәдениетті қалыптастыру мақсатында профилактикалық іс-шаралар тұрақты түрде жүргізуде. Акция барысында санитарлық тазалық нормаларының, құрылыс талаптарының сақталуы бойынша жүргізілген рейдтік шаралар нәтижесімен заң бұзушылықтарға жол берген төрт тұрғынға айыппұл салынып, 23 тұрғынға әкімшілік құқық бұзушылық туралы хаттама «ескерту» берілді, – дейді Сәкен Әбдіжаппар.
Ауыл әкімінің айтуынша, көп істе демеушілік тартып, ерікті ауыл жастарының көмегімен атқарып жатыр. Мәселен, осындай бастамалар арқылы орталық «Қараөзек» мешітін ағымдағы жөндеуден өткізіп, сыртқы қоршауының бір бөлігін метал қоршаумен жаңалап, жақсылық істеген.
– Мұнан бөлек, «Жеңіс күні» мерекесі қарсаңында «Ұлы Отан Соғысында қаза тапқан жауынгерлерге арналған ескерткішке» ағымдағы жөндеу жүргізіліп, қазіргі таңда ескерткіш алаңының бір бетінің қоршаулары жаңадан салынуда. Қараөзек елді мекеніне аяқ су келетін «ДСУ» каналының жиектері арнайы техникалармен нығайтылып, ағымдағы жөндеу жүргізілді. Қараөзек ауылының кіре берісіне «I love Qaraozek» инсталляциясы орнатылып, ауыл жастарының сүйікті фотозонасына айналды. Қараөзек ауылы көшелеріне қосымша үш дана билборд тұғырлары орнатылып, ауылдан шыққан соғыс және еңбек ардагерлерінің баннерлері ілінді. Әрине, мұның барлығы да көз қуанышымызға балар игі істер ғой, – дейді ауыл әкімі.
Аялдамалар жаңарып, жолы да тегістелген Қызылөзек – еңбеккерлердің мекені. Мұнда жан тазалығын жолға қойып, қазақылықтың иісі бұрқыраған жандар тұрады. Талайлы тіршілікте тазалыққа ден қойып, ауыл-аймақты абаттандырып отырған ауыл халқының осы тірлігіне сүйсініп қайттық.
Сапар соңында ауыл әкімі: «Үйге қонақ келсе, айналасын таза ұстап тұратынымыз бар ғой. Сол тәрізді қала іргесінде болған соң қонақ кеп қала ма деп үнемі таңғы тірлікті тазалықтан бастаймыз. Оның өзі сол күніңнің сәттілікке толы болып, көңіл көкжиегіңде де, көз алдыңда да тазалықтың алдымен тұрғаны жақсы ғой… «Таза Қазақстан» бастамасын бірінші болып қолдайтын Қызылөзек те тазалыққа келгенде табандылық танытады. Сөзімізге сен» деп арқамнан қақты.
Иә, «Таза Қазақстанды» «Таза Қызылөзек» те қолдайды…
Аян СПАНДИЯР
