Таза қала – өзің үшін. Әрине, адам баласының айналасындағы тазалық жұмыстарының әрбірі өзінің де денінің саулығына кепіл болады. Бұл ретте Қызылорда қаласына қарасты Қарауылтөбе ауылында сенбілік үзілген емес. Елді мекендегі мекемелердің қызметтері бір жағадан бас, бір жеңнен қол шығарып, белсенді жұмыс атқарып келеді.

– Қарауылтөбе ауылдық округінде 3 049 адам тұрады. Ауыл аумағында санитариялық тазалықты сақтау, абаттандыру және көгалдандыру бағытындағы жұмыстар тұрақты түрде жүргізілуде. Жыл басынан бері отызға жуық сенбілік ұйымдастырдық. Оған 600-ге жақын адам қатысты. Бұл жұмыс – ар алдындағы тазалығымыз. Айналамыздың таза болып, тыныс-тіршілігіміздің де жөнді болуы өзімізге байланысты, – дейді ауыл әкімі Еркін Ахетов.

Атқарылған сенбіліктер барысында 767 гектар аумақ тазартылып, 38 тонна тұрмыстық қатты қалдық шығарылды. Сонымен қатар, ауыл-аумағын көгалдандыру мақсатында 200 түп көктемгі ағаш көшеті отырғызылды. Бүгінде саялы ағаштар айналаға көрік беріп, жасыл-желекпен көмкеріп тұр.

– Аталған жұмыстарға ауылдағы әлеуметтік нысандардың қызметкерлері де тұрақты түрде атсалысып келеді. Атап айтқанда, мектеп, фельдшерлік-акушерлік пункт, ауыл әкімдігі, клуб, мешіт және балабақша ұжымдары әрбір сенбілікке белсенді қатысып, ауыл аумағын тазалау және абаттандыру жұмыстарына өз үлестерін қосуда. Қазіргі уақытта санитариялық тазалық жұмыстарын жүргізу бойынша ЖК «Ибраев» жеңімпаз болып танылып, тиісті жұмыстарды атқаруда. Сонымен қатар, ауыл тұрғындарын жұмыспен қамту мақсатында 10 ауыл тұрғыны ақылы қоғамдық жұмысқа тартылып, ауыл аумағын тазалау және абаттандыру жұмыстарына жұмылдырылған, – дейді ауыл әкімі.

Тұрғындардың тұрмыстық қатты қалдықтарын уақытылы жинау және шығару мақсатында қыркүйек айынан бастап «Қызылорда Тазалығы» ЖШС-мен келісімшарт жасалды. Келісімшартқа сәйкес, әр аптаның сенбі күні арнайы техника ауыл тұрғындарының үйлерінің алдына шығарылған тұрмыстық қатты қалдықтарды жинап, белгіленген орынға шығару жұмыстарын жүргізетін болады. Мұның өзі халыққа жасалған жағдайдың бір көрінісі тәрізді.

– Елдегі «Қызылорда тазалығы» серіктестігімен келісілгендей, қоқысты шығарып қоямыз. Олар әр аптаның сенбісінде жинап әкетіп тұрады. Ешкімнің ауласында шашылып жатқан қоқыс жоқ. Елдің тазалығына байланысты жұмыс әрине қарқынды жүріп жатыр. Әркім тазалықты өзі үшін сақтайды, – дейді ауыл тұрғыны.

Ауыл тұрғындарынан мұнда ақылы қоғамдық жұмысқа тартылғандар бар. Олар да елді мекен ішінен екі қолға бір күрек тапқанына қуанышты. Солардың қатарында Күлзат Жарболова да бар. Ол – Қарауылтөбе ауылдық округінде 2019 жылдан бері қоғамдық жұмысшы ретінде еңбек етіп келе жатқан белсенді азаматша.

– Тазалық жұмыстары алдыңғы қатарда тұруы керек. Ертеректе бір кісі көршісінің ауласына қоқыс тола шелегін тастап кеткен екен. Ал көршісі шелекті қоқыстан босатып, орнына алма толтырып апарып беретін көрінеді. Бір күні көршісі бір шелек алма ұсынып тұрғанда одан «Мен саған қоқыс толы шелек апардым, сен неге шелекті алмаға толтырып әкелесің?» деп сұрағанда әлгі кісі «Әркім өзінде бармен бөліседі» деген екен. Тағылым алар дүние. Кеудемізде қоқыс толмасын. Осы жұмыстан нәпақа тауып отырмын. Қуаныштымын. Не тапсақ та, еңбекпен тауып жүрміз, – дейді Күлзат.

Ол ауылдың санитарлық тазалығын сақтау, абаттандыру және көркейту жұмыстарына белсене қатысып, қоғамдық жұмыстарға өз үлесін қосып келеді. Ауыл аумағының тазалығын қамтамасыз етуге жауапкершілікпен қарап, тұрғындарға үлгі болып жүр. Еңбектегі белсенділігі мен ауылдың қоғамдық өміріне қосқан үлесі үшін облыс және қала әкімдерінің Алғыс хаттарымен марапатталған.

Мұндай еңбекқор жандарға ауыл тұрғындары да құрметпен қарайды. Өйткені, олар құрметке лайықты.

– Әкеңмен, шешеңмен жасты кісілер қоқыс жинап жүргенін көргенде өзің үшін қоқысты жерге тастамайсың. Арнаулы жерге апарасың. Адам баласының бойында ар-ұят болса, айналасына құрметпен қарайды. Біз ауылымызды таза ұстап, оның гүлденуіне атсалысып жүрген әрбір жанға ерекше алғыс айтамыз. Еңбектері жемісті болғай, – дейді Азамат есімді ауыл тұрғыны.

Иә, адам баласының жан сарайындағы тазалық айналасына да шуағын шашады. Елді мекеннің халқы жұмыла жүк көтеріп келеді. Туған жердің түтінінің түзу ұшып, бағы мен берекесі артқанын қалайды.

– Ауыл тұрғындарына ризамын. Тазалық десең де, көркейтіп, жасыл-желекке айналдыру десең де, қуана көш бастап тұрады. Біз қандай жетістікке жетсек те, кеңесе пішкен тонның келте болмайтынындай нәтиже. Алдағы уақытта да осылай еңбек ете береміз, – дейді ауыл әкімі.

Бақ ортасына орныққан керемет ауылдың көрінісінен, оның тазалығынан ерекше әсер алдық. Ауылға кіреберістен бастап саялы ағаштардың жапырағы сыбдырлап тұр…

Аян СПАНДИЯР