Жанбота Тұрсыновтың ұлттық спортта шәкірттері жетерлік. Ол өзі қызмет ететін Арал ауданының Жақсықылыш кентіндегі жастарға салауатты өмір салтын насихаттауда. Қызметтік міндетін мүлтіксіз орындаған Арал ауданы полиция бөлімінің қоғамдық қауіпсіздік бөлімшесінің учаскелік полиция инспекторы әрі ауыл жастарын жат әдеттерден бойын аулақ ұстауға баулып жүр.

Ол қызметтен тыс уақытта Жақсықылыш кентінің жастарын ұлттық спортқа баулып, олардың бос уақытын тиімді әрі пайдалы өткізуіне өз үлесін қосуда. Жастарға атқа міну мәдениетін үйретіп, атбегілік өнерінің қыр-сырын меңгертуге баса мән беріп келеді. Осы арқылы өскелең ұрпақтың ұлттық спортқа қызығушылығын арттырып қана қоймай атадан балаға жалғасқан салт-дәстүріміз бен ұлттық құндылықтарымызды дәріптеуге, оны жас ұрпақтың бойына сіңіруге атсалысуда.

Жанбота Байболатұлының бұл игі бастамасы жастардың спортпен шұғылдануына жағдай жасап қана қоймай, олардың рухани-адамгершілік тұрғыдан қалыптасуына да оң ықпал етуде. Полиция қызметкерінің жасөспірімдермен осындай бағытта жұмыс жүргізуі құқық бұзушылықтың алдын алу ісімен де сабақтас. Себебі бос уақытын пайдалы іске арнаған, спортпен айналысып, ұлттық құндылықтарды бойына сіңірген жас қоғамның белсенді әрі жауапты мүшесі болуға ұмтылады.

Оның бұл еңбегі – қызметтік міндеттен тыс атқарылып жатқан қарапайым іс емес, ел болашағына салынған үлес. Жастарға уақыт бөліп, ұлттық спортты насихаттау арқылы Жанбота Тұрсынов кейінгі буынға өз үлгісін көрсетіп, олардың бойында отансүйгіштік, жауапкершілік, еңбекқорлық және ұлттық құндылықтарға деген құрметті қалыптастыруға ықпал етіп келеді. Оның әрбір ісі – жас ұрпаққа берілген тағылым, әрбір бастамасы – ұлттық мұраны дәріптеуге қосылған үлес.