Сырдария ауданында қазақ халқының ұлттық салт-дәстүрлері мен әдет-ғұрыптарын дәріптеу, ұрпақтан-ұрпаққа жалғасып келе жатқан дәстүрлерді жаңғырту мақсатында «Күбі піскен – айран, майы шыққан – ырыс» тақырыбында әйел-аналар арасында сайыс өтті.

Сайысқа ауданға қарасты он елді мекеннен әйел-аналар қатысып, күбі пісу және май алу өнерінен бақ сынады. Қатысушылар қазақ халқының тұрмысында ертеден қалыптасқан ұлттық тағам дайындау дәстүрлерін көрсетіп, өз шеберліктерін ортаға салды.

Халқымыздың бойынан дарыған ұлттық құндылықтар төрге шыққан сайыста Жетікөл ауылының тұрғыны Жұлдыз Пржанова топ жарып, І орынның биігін бағындырды. Ал Нағи Ілиясов ауылынан келген Аймереке Мәмбекованың еншісіне ІІ орын бұйырды. Ақжарма ауылынан келген қатысушы Динара Ерімбетова үздік үштікті түйіндеді.

Жеңімпаздар мен қатысушыларға дипломдар, алғыс хаттар және бағалы сыйлықтар табысталды.

«Қазақ халқының салт-дәстүрі мен ұлттық тағамдары – ұрпаққа қалдырылған құнды мұра. Осындай іс-шаралар арқылы халқымыздың тұрмыс-тіршілігіне тән дәстүрлер дәріптеліп, ұлттық құндылықтарды кейінгі ұрпаққа жеткізуге мүмкіндік беріледі», – дейді ұйымдастырушылар.