Қазіргі білім беру жүйесінің басты міндеттерінің бірі-әрбір білім алушының сапалы білім алуына тең мүмкіндік жасау. Бұл міндет әсіресе денсаулық жағдайына байланысты немесе басқа да себептермен үйден білім алатын оқушылар үшін ерекше өзекті. Мұндай білім алушылардың оқу үдерісі дәстүрлі мектеп жағдайынан өзгеше ұйымдастырылатындықтан, олардың оқу материалын толық әрі сапалы меңгеруіне мүмкіндік беретін цифрлық білім беру ортасын қалыптастыру қажеттілігі артып отыр. Соңғы жылдары әлімдік тәжірибеде цифрлық білім беру ресурстарын пайдалану оқыту сапасын арттырудың маңызды факторы ретінде қарастырылуда.Бейнесабақтар, зертханалық, практикалық жұмыстар, интерактивті тапсырмалар және жедел кері байланыс білім алушылардың пәнге қызығушылыған арттырып қана қоймай, олардың өздігінен білім алу дағдыларын қалыптастырады. Химия пәнін оқытуда көптеген тақырыптар тәжірибелік жұмыстар арқылы түсіндірілетіндіктен, үйден оқитын оқушылардың зертханалық жұмыстарға толық қатыса алмауы олардың пәнді меңгеруіне белгілі бір қиындықтар туғызады. Өзімнің педагогикалық тәжірибемде үйден оқитын білім алушылармен жұмыс жасау барысында бірнеше мәселеге назар аудардым. Біріншіден, сабақ уақыты шектеулі болғандықтан кұрделі тақырыптарды толық түсінуге мүмкіндік әрдайым бола бермейді. Екіншіден, оқушы түсінбеген материалды бірнеше рет қайталап көру мүмкіндігін қажет етеді. Үшіншіден, зертханалық жұмыстардың көпшілігін қауіпсіздік талаптарына байланысты үй жағдайында орындау мүмкін емес. Осы қажеттіліктерді ескере отырып, «Chemlab» авторлық цифрлық платформасын әзірледім. Платформада химия пәнінің барлық негізгі тақырыптары бойынша бейнесабақтар, презентациялар, зертханалық жұмыстардың бейнежазбалары, тақырыптық тапсырмалар және жасанды интеллект негізіндегі чат-бот арқылы ұйымдастырылған кері байланыс жүйесі біріктірілген. Мұндай кешенді цифрлық орта оқушыға кез келген уақытта оқу материалын қайталауға, өзіне ыңғайлы қарқынмен білім алуға және қажетті ақпаратты жылдам алуға мүмкіндік береді. Платформаның өзектілігі:инклюзивті білім беру қағидаттарын жүзеге асыруға ықпал етеді, цифрлық білім беру ресурстарын тиімді пайдалануға негізделген, үйден оқитын білім алушылардың білім сапасын арттыруға бағытталған, оқушының өзіндік оқу әрекетін ұйымдастыруға мүмкіндік береді. «Chemlab» платформасын әзірлеу барысында білім берудің заманауи педагогикалық технологиялары мен ғылыми-әдістемелік қағидалары басшылыққа алынды. Әрбір бейнесабақ нақты оқу мақсатына сәйкес құрылып, күрделі ұғымдарды қарапайым тілмен түсіндіруге бағытталған.
Салтанат БОЛАТҚЫЗЫ,
Астана қаласы әкімдігінің №115 жалпы орта білім беретін мектебінің химия пәнінің мұғалімі
