Қызылордаға он жылдап келмеген кісілер әуежайдан аяғы салбырап түсе салысымен біздің өңірдің тазалығына тамсанып жатады. Әрине, ол көзге көрініп тұрған нәрсе. Қызылорданың қаншалықты өзгергенін Мемлекет басшысы да арнайы тоқталып айтып өткені есімізде.

Таяуда Президент осы акцияға байланысты айтқан сөзінде: ««Таза Қазақстан» жобасының мақсаты – елімізді көркейту, жұртымызды ортақ іске жұмылдыру арқылы ынтымақ-бірлігімізді күшейту. Бүгінде Қазақстанның әр аймағында ауқымды жұмыс істеліп жатыр. Жыл басынан бері еліміз бойынша 600-ден астам түрлі экологиялық іс-шара өтті. Осы маңызды жұмысқа 7 миллион адам қатысты, 130 мыңнан астам гектар жер тазартылды. Елімізде 1,3 миллион тал егілді», – деді.

Міне, қараңыз, адамдардан алдымен отбасы, отбасылардан ауыл, елді мекендер құралады. Ал ауылдан аудан, ауданнан облыс, облыстардан тұтас республика құралады. Бұл енді әлімсақтан аян нәрсе. Енді әрбіріміз өзіміздің отбасында жылына 4-5 ағаштан еккеннің өзінде Қазақстанда бір жылда 20 млн-нан астам тал егіледі екен. Ойланайықшы. Тамаша емес пе?! Демек, «Таза Қазақстан» тек сенбіліктен тұрмайды. Ол – тазалықты да, көркейту-көгалдандыруды да негізгі мақсатына айналдырған жоба.

Сондықтан, «Таза Қазақстан» жалпыұлттық акциясы — маусымдық жұмыс емес. Ол біздің күнделікті дағдымызға айналуға тиіс нәрсе. Мен барлығыңызды аталған акцияға белсене қатысуға шақырамын.

Дәулет ҚЫРДАН,