Елімізде жол жағдайына көңілі толмайтындар жетерлік. Мұндай мәселе бүгінде мемлекеттік деңгейде көтеріліп келеді. Петропавлдағы Алматы және Гоголь көшелерінің қиылысы жаңбырдан кейін адам жүріп, көлік өте алмайтын күйге түседі, деп хабарлайды Sn.kz ақпарат порталы.

Тұрғындардың айтуынша, жауыннан соң жолдағы шұңқырларға су жиналып, бірнеше күн бойы көлшік пен батпақ кетпей қояды. Соның салдарынан бұл жерден өту жүргізушілерге де, жаяу жүргіншілерге де қиындық туғызған. Видеодан жол жабынының ойылып, кей тұсының суға толып жатқанын көруге болады. Айта кетейік, бұған дейін қала билігі Алматы көшесінің басқа бір бөлігінде жол жөндеу қажеттігін анықтағанымен, қаржы бөлінбегендіктен жұмысты 2026 жылғы жоспарға енгізген. Қазір тұрғындар Алматы мен Гоголь көшелерінің қиылысындағы мкәселенің де шешілгенін қалайды.

Жол сапасына қатысты Мемлекет басшысы таяуда ғана сөйлеген сөзінде тоқталды.
– Үкімет пен әкімдер қала және ел ішіндегі, яғни ірі немесе шағын қалалардан тысқары жолдардың сапасына баса назар аударуы керек. Бұл – біздің ең осал тұсымыз, оны мойындаған жөн. Мұны ешкім шеше алмады немесе шешуге құлық танытпады. Масқара жағдай. Оны саботаж деуге болады. Заң аясында қатаң шаралар қолданамыз, – деді Қасым-Жомарт Тоқаев.