Бірнеше жылдан бері Қызылорда қаласының арық жүйелері «Қызылорда тазалығы» мекемесіне тапсырылған болатын. Ерте көктемнен бастап, сарқырамадан сарқыратып су жіберіп, тіршілік иелері жанданып, жерге көк шыққаннан тер төгіп жүрген мамандар бұл істе қаншалықты межеге жетіп жүр? Облыс әкімдігінде өткен мәжілісте Қызылорда қаласын аяқсумен қамтудың және суару жүйесінің қазіргі жағдайы, алдағы кезеңге арналған жоспарлар талқыланды.

– Су ресурстарына толық талдау жүргізіп, қалаға қажетті көлемді нақтылап, келесі жылға су беру мүмкіндігін қарастыру маңызды. Әуежай маңы мен Белкөл кентіне кіреберіс аумақтардағы жасыл белдеуге аяқсу тұрақты берілуі және тал отырғызылуы керек.

Арық жүйелерін толық түгендеп, су жетпейтін учаскелерге қатысты нақты жобалық және қаржылық ұсыныс енгізіңіздер. Аяқсумен қамтылған аумақтарды кезең-кезеңімен ұлғайту үшін нақты жоспар әзірлеңіздер. Көшет отырғызу және оларды суаруды ұйымдастырыңыздар, – деді облыс әкімі Мұрат Нәлқожаұлы.

Бүгінде қала аумағына аяқсу 15 нүктедегі 22 насос қондырғысы арқылы беріледі. Оның 4-еуі биыл орнатылған. Арық жүйелерінің жалпы ұзындығы 98,8 шақырым, ол 68 көшені қамтиды. «Жібек жолы», «Сарқырама» және «Қызылжарма» каналдары арқылы 14,4 шақырымдық үлкен лоток жүйесі, 39 көшеде 68,6 шақырым болатын кіші лотоктар, ал 26 көшеде 15,8 шақырымдық лотоксыз арық жүйесі бар. Қала ішіндегі арықтарға су 6 аумақтағы насос қондырғылары арқылы таратылады.

– Бізге бұл жұмыс бірнеше жылдан бері тапсырылған. Қазір осы жұмыстарға мамандар, әсіресе ер балалар, жастар керек. «Қызылорда тазалығы» тек тазалықпен айналыспайды, осындай қоғамдағы маңызды, жауапкершілігі зор істер бар, – деді кәсіпорын директоры Сапарғали Асылбеков бізбен әңгімесінде.

Алдағы уақытта №217 мектеп ауласындағы су ұңғымасы жөнделіп, қайта іске қосылады. Бұл Қорқыт ата көшесінің бір бөлігіне аяқ су жеткізуге мүмкіндік туғызады. Аяқсу жеткізілген аумақтарды көгалдандыру мақсатында Мұстафа Шоқай, Қожа Ахмет Яссауи және Дінмұхаммед Қонаев көшелерінің бойына көшет отырғызылады.

«Qyrdan»-ақпарат