Жасыл аула… Жайқалған ағаш… Көңіл сарайыңды көркем етіп, тынысыңды ашатын мұндай ғажайып көрініс Қызылорда қаласында жетіп артылады. Он сотықтап жер алғандар он жылдап ауласын көгерте алмай жатса, көпқабатты үйдің ауласына еккен талдары екінші қабатқа ентелеп тұр. Терезеңді ашсаң, жасыл жапырақ жаныңа ғажап сезім сыйлайды. Осындай керемет ауланың бірі – Сырдария тұрғын ауданындағы №10 үйдің ауласы.

Еңлік Жүсіпбай он алты жылдан бері осы тұрғын ауданында тұрады. Ауланы көгалдандыруды бастаған алғашқылардың бірі. Кейін мұндай жақсы бастама тұрғындардан қолдау тауып, тұрғындар бірлесе жұмылып әрекет еткен. Табиғатты тамшымен суарып, көпшілік көл етті.

– Әлбетте, көпқабатты үйде менің меншігімде тек пәтерім ғана деп қарап отыруға болмайды. Ортақ меншік ауламызды көркейтуде әрбіріміздің теріміз тамуы керек. Сондықтан біз осы бастаманы қолдап, айналамызды жасыл-желекке айналдыруға бар күш-жігерімізді салып жатырмыз. Еңбегіміздің жемісі ә дегеннен көрініп, ағаш биіктеген сайын еңсеміз де көтеріле түсті. Қазір Қызылордада бізден басқа да тұрғындар осы істі үлгі етіп жүр. Осылай бір-бірімізден жақсы нәрсені дағды етіп, үйреніп жатсақ, қандай ғанибет, – дейді Еңлік Серікқызы.

Ә дегенде тұрғындар бір жеңнен қол шығарып, табиғат ананы аялап, өздеріне де жақсы жағдай жасап алған. Жыл сайын бір ауыздан күтіп-баптайды. Әсіресе, есіктің алдындағы жабайы жүзіммен көмкерілген күнқағарлар керемет әсер қалдырады.

– Қазақта үй таңдама, алдымен көршіні таңда дейді ғой. Қанша заманауи үйде тұрсаң да, көршің дұрыс болмаса қиын. Мен бір жылдан бері осында тұрамын. Үйдің ауласына қарап-ақ көршілерді таныдым. Бірлігі жарасқан, бір-бірін түсінетін, бір үйдің адамдарындай екен дедім. Қателеспеппін. Бір шыбықтың түзу өсуіне атсалысып, айналамызға үлесімізді тигізу – қандай бақыт. Қазақ «атаңнан мал қалғанша, тал қалсын» деген. Көгеріп, көктеген ауламызды көрген жандар сүйсініп, тамсанып кетіп жатыр, – дейді Бақыт Төлеміс.

Бұл бастама тұрғындар арасындағы ауызбіршілікті арттырып, ортақ мүлікке ұқыпты қарау мәдениетін қалыптастыратыны белгілі. Өздері баптаған бақты күтіп-ұстауға көршілер белсенді атсалысады. Бүгін егілген бір тал бірнеше жылдан кейін саяға айналады. Әр отбасы өз ауласына жас шыбық отырғызса, оның өзі үлкен олжа. Сондықтан ауламызға күтім жасап, көгалдандыруға, тазалыққа баршамыз үлес қосуымыз қажет. Бұл ретте қоғам белсендісі Болат Нұрқожаевтың ауласын да ерекшелеп айтуға болады. Болат Жолтайұлы Қызылорда халқына көркейту-көгалдандыру, жасыл-желекке айналдыру ісімен ерекше. Таяуда оның ауласын көріп қайттық.

– Міне, мына ағаштың егілгеніне әрі кетсе үш жылдың шамасы болды. Суы, күтімі дұрыс болса, қажетсіз бұтақтарын балақтап отырсаңыз, жақсы өседі. Мен дәннен де шығардым, қаламшадан да, көшеттен де шығардым. Тіпті өздеріңіз білесіздер, мешіттің маңайының барлығын жасыл-желекке айналдырдық. Ізіңнен жақсы іс, жақсы сөз қалса, қандай ғанибет. Біз тал егу жұмыстарын тоқтатпаймыз. Талды егу бар, одан кейін қарауды, күтіп-баптауды ұмытпауымыз керек, – дейді ол.

Орталық көшелердегі мекемелер де айналасын көгертіп, ағаш егіп, жайқалтып отыр. Мұның әрбірі қоғам үшін пайдалы іс. Әйтсе де, тұтас қоғам болып, «Таза Қазақстан» тәрізді жалпыұлттық экологиялық ісшаралардың маңызын түсіне отырып, із қалдыру – барлығымыз үлгі аларлық іс.

«Qyrdan» — ақпарат