Жол сапасын бақылауда цифрлық технологияларды қолдану зертханалық сынақтардың дәлдігін арттырып, құрылыс жұмыстарының белгіленген талаптарға сәйкестігін бағалауға мүмкіндік береді. Осы бағытта «Жол активтері сапасының ұлттық орталығы» ШЖҚ РМК қолданатын KazRoadLab ақпараттық жүйесі маңызды рөл атқарады.
Жүйе жол инженерлері мен зертханалардың жұмысын бір цифрлық ортаға біріктіреді. Сынама алынған сәттен бастап зерттеу нәтижесі дайын болғанға дейінгі мәліметтер электронды түрде тіркеледі.
Қызылорда облысында да жол құрылысы мен жөндеу жұмыстарының сапасын бақылау үшін мамандар нысандарға шығып, құрылыс материалдарынан сынама алады. Зертханада қиыршық тас, құм, битум және асфальтбетонның сапасы, жол қабаттарының қалыңдығы мен тығыздығы белгіленген талаптарға сәйкестігі тұрғысынан тексеріледі. Анықталған кемшіліктер бойынша мердігер ұйымдарға ескертулер беріліп, оларды жою жөнінде ұсынымдар жасалады.
Мәселен, Қызылорда қаласындағы Сағымбаев көшесінде жүргізілген бақылау кезінде 23 тексеру барысында 46 сынама алынған. Зерттеу нәтижесінде олардың 20-сы белгіленген талаптарға сәйкес келмеген. Мұндай тексерулер сапа талаптарының бұзылуын анықтап, тиісті шаралар қабылдауға негіз болады.
KazRoadLab жүйесінде инженер планшет арқылы материал туралы ақпаратты енгізіп, сынама алынған орынды белгілейді және фотосуреттерді тіркейді. Әр сынамаға жеке QR-код беріледі, бұл оның зертханалық зерттеу тарихын бақылауға мүмкіндік береді.
Жүйенің маңызды ерекшелігі — зертхана қызметкерлері сынаманың қай нысаннан алынғанын, мердігер мен тапсырыс берушінің кім екенін көрмейді. Бұл зерттеу нәтижелеріне сыртқы ықпал ету тәуекелін азайтуға көмектеседі.
Сонымен қатар сынақ жабдықтарынан алынған деректер жүйеге тікелей енгізіліп, қажетті есептеулер автоматты түрде жүргізіледі. Өлшеу көрсеткіштері камераға түсіріліп, фотосуреттер нәтижелермен бірге сақталады. Бұл қолмен енгізуден туындайтын қателерді азайтып, қажет болған жағдайда бастапқы деректерді қайта тексеруге мүмкіндік береді.
Тапсырыс берушілер мен мердігерлер жүйе арқылы өз нысандарына қатысты сынақ нәтижелерімен және ескертулермен танысып, құжаттар тіркей алады әрі жауап жолдайды. Осылайша, ақпарат алмасу жеңілдеп, анықталған кемшіліктер бойынша жұмыс жүргізу тиімділігі артады.
KazRoadLab Ұлттық орталықта 2019 жылдан бері қолданылады. 2024 жылы жүйе жұмысын жеделдету және мүмкіндіктерін кеңейту мақсатында жаңа технологиялық платформаға көшірілді.
KazRoadLab-тың басты артықшылығы — сынамадан бастап зертханалық қорытындыға дейінгі мәліметтерді бір жүйеде сақтау, нәтижелердің объективтілігін арттыру және сапаны бақылау процесінің ашықтығын қамтамасыз ету. Бұл Қызылорда облысындағы жол құрылысы мен жөндеу жұмыстары кезінде материалдардың сапасын бағалауға және анықталған сәйкессіздіктерді уақытылы жоюға ықпал етеді.
