Цифрландыру мен автоматтандыру Қазақстанның агроөнеркәсіптік кешенін дамытудың маңызды құралдарына айналуда. Солтүстік Қазақстан облысы заманауи технологиялардың мал шаруашылығының тиімділігін арттыруға және өндіріс көлемін ұлғайтуға қалай ықпал ететінін көрсетіп отыр, деп хабарлайды Kazinform.
«Атамекен-Агро-Қорнеевка» кәсіпорнында жануарлардың жағдайы мен сүт өнімділігін бақылауға арналған DairyPlan және CowScout жүйелері қолданылады. Ал «СК Агро 2050» ЖШС-де 100 басқа арналған «Карусель» типті сауу қондырғысы жұмыс істейді. «Зенченко және К» КТ жылына 38 мың тоннаға дейін сүт өндіруге қауқарлы, 9 мың басқа арналған тауарлы-сүт фермасын салу жобасын жүзеге асыруда.
— Цифрлық технологиялар жануарлардың жағдайын жедел бақылауға, ресурстарды тиімді пайдалануға және еңбек өнімділігін арттыруға мүмкіндік береді. Бұл енді жекелеген үдерістерді автоматтандыру ғана емес, ауыл шаруашылығы өндірісін басқарудың жаңа деңгейі, — деп атап өтті Солтүстік Қазақстан ауыл шаруашылығы тәжірибе станциясының директоры Виталий Заика.
Ауқымды өзгерістер республикалық деңгейде де жүзеге асырылуда. 2025 жылдың қорытындысы бойынша Қазақстанның ауыл шаруашылығының жалпы өнім көлемі 9,8 трлн теңгеге жетті. Бұл 2019 жылмен салыстырғанда екі есеге жуық көп. Саланың дамуына ықпал еткен факторлардың бірі — мемлекеттік қолдау. 2025 жылы агроөнеркәсіптік кешенді жеңілдетілген қаржыландыруға 1 трлн теңгеге дейін қаражат қарастырылды.
Саланы жаңғырту бағыты Мемлекет басшысы айқындаған еңбек өнімділігін арттыру, цифрлық шешімдерді енгізу және азық-түлік қауіпсіздігін нығайту міндеттеріне сәйкес келеді.
— Мемлекеттік қолдау шаруашылықтарға өндірісті жаңғыртуға, жабдықтарды жаңартуға және ірі инвестициялық жобаларды жүзеге асыруға қосымша мүмкіндіктер береді. Қаржылық құралдар заманауи технологиялармен және мамандардың кәсібилігімен ұштасқанда, бұл бүкіл агроөнеркәсіптік кешеннің тұрақты дамуына негіз қалайды, — деп атап өтті Виталий Заика.
Солтүстік Қазақстан облысының тәжірибесі цифрландыру мен заманауи технологияларға инвестиция салу Қазақстанның ауыл шаруашылығы саласының бәсекеге қабілеттілігін арттырудың маңызды шарттарына айналғанын көрсетеді.
