Қуаңдарияда өткен футбол турнирі достық пен ынтымақтың мерекесіне айналды

Спорт – адамды шыңдап қана қоймай, ортақ мақсат жолында біріктіретін ерекше күш. Жасқа да, кәріге де ортақ спорттың құндылығы – жеңісте ғана емес, өзара құрмет пен татулықта. Осындай ізгі мақсатты көздеген шаралардың бірі 2026 жылғы 29 қазанда Қармақшы ауданының Қуаңдария ауылында өтті.

Қазақстан Республикасы Ұлттық қауіпсіздік комитеті Шекара қызметінің Қызылорда облысы бойынша департаментіне қарасты Қуаңдария шекара бөлімінің ұйымдастыруымен футболдан ауылдық турнир өткізілді. Спорттық додаға бес команда қатысып, жасыл алаңда өзара мықтыны анықтады.

Жарыс барысында командалар жеңіске деген жігерін танытып, алаңда бар күш-жігерін салды. Әрбір шабуыл мен әрбір голға жанкүйерлер ерекше ықыласпен қолдау білдіріп, ойынның көркін қыздырды. Тартысты кездесулер қатысушылардың спорттық дайындығын ғана емес, командалық рухы мен ұйымшылдығын да айқындады.

Нәтижесінде Қуаңдария шекара бөлімінің командасы жарыстың жүлделі екінші орнын иеленді. Бұл – әскери қызметшілердің қызметтегі тәртібі мен жауапкершілігінен бөлек, спорттағы белсенділігінің де көрінісі.

Аталған турнирдің мәні жүлделі орындармен ғана өлшенбейді. Оның басты жетістігі – шекарашылар мен ауыл тұрғындарының басын қосып, өзара сыйластық пен бауырмалдықты нығайтуында. Өйткені шекара қызметі – тек мемлекеттік шептің қауіпсіздігін қамтамасыз ету ғана емес, елдің тыныс-тіршілігімен біте қайнасып, халықпен бірге болуды да білдіреді.

Шекарашы үшін Отан ұғымы – қасиетті. Ал сол Отанның әрбір ауылы мен әрбір тұрғынының амандығы – ортақ құндылық. Осындай спорттық және қоғамдық шаралар арқылы әскери қызметшілер өскелең ұрпаққа үлгі көрсетіп, салауатты өмір салтын насихаттауға өз үлестерін қосып келеді.

*Бірлігі бекем елдің шекарасы да берік.* Қуаңдарияда өткен бұл турнир – спорттың адамдарды жақындастыратын, ел ішіндегі ынтымақты арттыратын күш екенін тағы бір мәрте дәлелдеді.

spot_img

ҰҚСАС ЖАЗБАЛАР

Ұқсас жазбалар