Ел ертеңінің жарқын келбеті

«Жастар – елдің ертеңі» деген сөздің астарында қаншама үміт, қаншама сенім, қаншама жауапкершілік жатыр. Расында, әр дәуірдің өз үні, әр кезеңнің өз жаңалығы, әр ұрпақтың өз қолтаңбасы болады. Ал бүгінгі Сыр өңірінің жастары – уақыт көшінен қалмай, туған жердің тұғырын биіктетіп, елдік мұрат жолында еңбектеніп келе жатқан жалынды буын. Олардың жүрегінде – туған жерге деген махаббат, санасында – жаңашылдық, бойында – бабалардан қалған өр рух бар.

Сыр десе, ойға алдымен жыр қонақтаған қасиетті өлке, дарияның жағасында тамыр жайған тағылымды тарих, талай таланттың тұсауын кескен киелі мекен оралады. Қорқыттың қобызы күңіренген, жыраулардың үні жаңғырған, елдік пен ерліктің өнегесі ұрпақтан ұрпаққа жалғасқан бұл топырақтың тағдыры қашанда жасампаздықпен астасып келеді. Бүгін сол бай мұраны бойына сіңіріп, заман талабына сай түлеп келе жатқан жаңа буын қалыптасты. Олар – Сырдың сырын ұққан, елдің мұратын түсінген, болашаққа батыл қадам басқан жастар.

Бүгінгі жас ұрпақтың болмысы бөлек. Көзқарасы кең, талабы биік, талғамы терең. Бірі білімнің биігін бағындыруды мақсат етсе, енді бірі ғылымның жаңа көкжиегін ашуға ұмтылады. Бірі кәсіпкерлік әлемінде өз жолын қалыптастырып жүрсе, енді бірі өнер мен мәдениеттің өрісін кеңейтіп, спорт алаңында Сырдың атын асқақтатуда. Әрқайсысының бағыты бөлек болғанымен, барлығына ортақ бір қасиет бар. Ол – алға ұмтылу, ізденуден жалықпау және туған жерінің өркендеуіне үлес қосу.

Сыр жастарының бүгінгі жетістігін сөз еткенде, ең алдымен, білімге деген құштарлығын айрықша атап өткен жөн. Білім – адамды биікке жетелейтін шамшырақ болса, сол шамшырақтың жарығына ұмтылған жастардың талабы көңілге қуаныш ұялатады. Қазіргі таңда өңір жастары отандық және халықаралық білім кеңістігінде өзіндік із қалдыруға талпынып келеді. Жаңа технологияларды меңгеріп, шет тілдерін үйреніп, ғылыми жобаларға қатысып, түрлі байқаулар мен зияткерлік сайыстарда бақ сынап жүрген өрендердің қатары артып келеді. Олардың әрбір жеңісі – жеке адамның жетістігі ғана емес, тұтас өңірдің мерейі.

Бір кездері ауыл мектебінің қарапайым партасында отырып, үлкен армандарға қанат қаққан жас бүгінде әлемдік білім кеңістігінде өз орнын табуы мүмкін. Өйткені арманның мекені алыс-жақынға бөлінбейді. Маңыздысы – сол арманға бастайтын талап пен табандылық. Сыр топырағынан түлеп ұшқан талай жастың түрлі салада жетістікке жетуі осының айқын дәлелі. Олар туған жерден алған тәлімін, өскен ортасынан сіңірген өнегесін өмірлік жолына бағдар етіп келеді.

Жастардың тағы бір жарқын қыры – жаңашылдыққа бейімділігі. Бүгінгі қоғам тек білімді ғана емес, бастамашыл, ізденімпаз, тың идея ұсына алатын азаматтарды қажет етеді. Осы тұрғыдан алғанда, Сыр жастарының кәсіпкерлікке бет бұруы, жаңа жобаларды қолға алуы, өз ісін ашып, өзгелерге де мүмкіндік жасауы – өңір дамуының маңызды көрінісі.

Бірі шағын өндірісті өркендетсе, енді бірі ұлттық өнімді заманауи үлгіде ұсынып, қолөнерді кәсіпке айналдыруда. Тағы бірі цифрлық технологиялар мен жаңа қызмет түрлерін игеріп, уақыт талабына сай жұмыс істеуде.

Әсіресе, туған жерінде тұрақтап, сол өлкенің дамуына үлес қосуды таңдаған жастардың бастамасы ерекше құрметке лайық. Себебі туған жердің гүлденуі алыстан келетін бір ғажайыпқа емес, өз топырағында еңбек етіп жүрген азаматтардың ниеті мен ісіне байланысты. Жастардың бойындағы кәсіпкерлік қабілет пен жасампаздық рух Сырдың экономикалық әлеуетін арттырып қана қоймай, келешек ұрпаққа да жаңа мүмкіндіктердің есігін ашады.

Сыр жастарының рухани болмысы да бөлек әңгімеге арқау боларлық. Өйткені бұл өңірдің жастары үшін тарих пен дәстүр – өткеннің естелігі ғана емес, бүгінгі өмірдің де ажырамас бөлігі. Қорқыттың күйін тыңдап, жыраулардың жырын жаттап өскен ұрпақ ұлттық құндылықтың қадірін терең түсінеді. Домбыраның қос ішегінен төгілген күй, сахнада шырқалған әсем ән, жас ақынның жүрегінен туған жыр – мұның барлығы Сырдың рухани әлемін байыта түседі.

Бүгінде өңірде өнерге құштар, шығармашылыққа жақын жастардың жаңа легі қалыптасып келеді. Әдебиетке ден қойған жас қаламгерлер, сахнада өнер көрсетіп жүрген таланттар, ұлттық мұраны насихаттап жүрген өнерпаздар – рухани сабақтастықтың жарқын жалғасы. Олардың өнері арқылы Сырдың үні кеңірек естіліп, киелі өлкенің мәдени келбеті жаңа қырынан таныла түсуде. Бұл – ұрпақтар арасындағы үзілмеген алтын арқау, бабалардан қалған аманаттың бүгінгі буын қолындағы жалғасы.

Ал спорт саласында жүрген жастардың жетістігі – жігер мен тәртіптің, табандылық пен төзімнің жемісі. Жеңіс тұғырына көтерілген әрбір спортшының артында талай сағаттық жаттығу, маңдай тер мен үлкен еңбек тұрады. Сыр өңірінен шыққан жас спортшылардың республикалық және халықаралық жарыстарда бақ сынауы, көк туымызды биікте желбіретуге ұмтылуы – барша жұртшылыққа қуаныш сыйлайтын көрініс. Спорт – тек жеңіс пен жүлденің жолы емес, ол – мінез қалыптастыратын, адамды тәртіпке баулитын, жігерді шыңдайтын үлкен мектеп. Осындай мектептен өткен жастардың өмірге деген көзқарасы да нық, мақсаты да айқын болмақ.

Жастардың қоғам өміріндегі белсенділігі де Сырдың бүгінгі келбетіне ерекше серпін беріп отыр. Еріктілік қозғалысына қатысып, қайырымдылық шараларына атсалысып, қоғамдық бастамаларды қолдап жүрген жастардың ісі – адамгершіліктің әдемі үлгісі. Бірі үлкенге құрмет көрсетіп, қарттардың батасын алуға асықса, енді бірі бүлдіршіндерге қуаныш сыйлап, әлеуметтік жобаларға үлес қосуда. Осындай игі істердің әрқайсысы мейірім мен жанашырлықтың ұрпақ санасында берік орныққанын аңғартады.

Жақсылық жасау үшін үлкен мүмкіндік немесе мол қаражат қажет емес. Кейде бір адамның көңілін көтеру, бір игі іске қол ұшын созу, айналаңа пайдалы болуға ұмтылудың өзі – үлкен азаматтықтың белгісі.

 

Сыр жастарының бойынан осындай ізгі қасиеттерді көру – келешекке деген сенімді арттыра түседі. Өйткені елдің еңсесін көтеретін тек кәсіби білімі мен жетістігі ғана емес, оның жүрегіндегі адамгершілігі мен азаматтық ұстанымы.

Сыр өңірінің жастары туралы сөз қозғағанда, ауыл жастарын да ерекше атап өткен жөн. Кең даланың тынысын сезініп, туған топырақтың қадірін біліп өскен ауыл баласының бойында табиғатпен біте қайнасқан қарапайымдылық пен еңбекқорлық бар. Бүгінде ауылда жүріп те үлкен жетістіктерге жетуге, тың бастамаларды жүзеге асыруға болатынын дәлелдеп жүрген жастар аз емес. Олар ауыл шаруашылығын дамытуға, кәсіп ашуға, мәдени және қоғамдық өмірді жандандыруға өз үлестерін қосуда. Әрине, туған жердің төсінде тамыр жайып, сол өлкенің дамуына қызмет ету – нағыз отаншылдықтың көрінісі.

Бүгінгі Сыр жастарының тағы бір ерекшелігі – туған жердің тарихын танып, оның келешегіне бейжай қарамауы. Олар үшін Сырдария – жай ғана өзен емес, талай дәуірдің куәсі болған қасиетті дария. Қызылорда – картадағы қала атауы ғана емес, тағдыры мен тарихы тұтасып жатқан алтын бесік. Ал Сыр бойындағы әрбір ауыл мен елді мекен – өзіндік шежіресі, өзіндік өнегесі бар ыстық мекен. Осындай сезіммен өскен ұрпақтың туған жеріне деген ықыласы да, жауапкершілігі де ерекше болары анық.

Қазақта «Ел боламын десең, бесігіңді түзе» деген тағылымды сөз бар. Ал сол бесіктен түлеп шыққан ұрпақтың саналы, білімді, рухы биік болуы – елдің ең үлкен байлығы. Жастарға жасалған әрбір мүмкіндік, олардың қабілетін шыңдауға бағытталған әрбір бастама – болашаққа салынған инвестиция. Сондықтан жас буынның талабын қолдап, олардың арманын жүзеге асыруға жағдай жасау – қоғамның ортақ міндеті. Ал жастар үшін ең бастысы – берілген мүмкіндікті тиімді пайдаланып, білім мен еңбектің арқасында биік белестерді бағындыру.

Бір сәт ойлап қараңызшы: бүгін кітапхана төрінде білім іздеп отырған жас ертең елдің ғылымын дамытады. Бүгін шағын кәсібін бастаған талапкер ертең ондаған адамды жұмыспен қамтитын кәсіпкерге айналады. Бүгін сахнада алғаш рет ән шырқап тұрған жас өнерпаз ертең қазақ өнерінің абыройын асқақтатуы мүмкін. Ал бүгін туған ауылының тазалығына, көркеюіне үлес қосып жүрген жас ертең елдік мәселелерге араласатын білікті азамат болып қалыптасады. Демек, үлкен болашақтың бастауы бүгінгі қарапайым істерден өрбиді.

Сырдың сырлы жастары – тек ертеңнің иесі ғана емес, бүгінгі күннің де белсенді жасаушылары. Олардың әрбір ізденісі, әрбір бастамасы, әрбір жеңісі туған өлкенің шежіресіне жаңа бет қосып келеді. Бірі біліммен, бірі өнермен, бірі еңбегімен, бірі қайырымдылығымен қоғамға пайдасын тигізуде. Осындай сан салалы талант пен бір арнаға тоғысқан ортақ мақсат барда Сырдың келешегіне сеніммен қарауға толық негіз бар.

Сыр – сан ғасырлық тарихтың куәсі, жыр мен күйдің мекені. Бұл өлкенің өткенін ұлықтап, бүгінін жарқыратып, ертеңін қалыптастыратын да – жас ұрпақ.

Бабалар аманатын арқалаған бүгінгі буынның алдында ұлы міндет, асқақ мұрат тұр. Ол – туған жердің абыройын асқақтату, елдің дамуына үлес қосу, ұлттың рухани құндылықтарын келер ұрпаққа аман жеткізу.

Жас ұрпақтың жүрегінде жалын, бойында жігер, санасында сәуле барда Сырдың аспаны әрдайым ашық, болашағы әрдайым жарқын болмақ. Өйткені Сырдың ертеңі – алыстағы арман емес, бүгінгі жас ұрпақтың қолындағы үлкен мүмкіндік. Сырдан түлеген ұрпақтың қанаты талмасын, арманы аласармасын!

ШҰҒЫЛА ДҮЙСЕНОВА

257 мектебінің 11 сынып оқушысы

spot_img

ҰҚСАС ЖАЗБАЛАР

Ұқсас жазбалар