Қазақтың қазақтығы мен азаттығы алдыңғы орында тұруы керек. Ел тарихындағы «Болашаққа бағдар: Рухани жаңғыру» да осыны негізге алған еді. Бүгінде ел арасында жиі өткізіліп жатқан кездесулердің бірі – «Руханият керуені». Керуен көштен қалған жоқ па? Жоба аясында жұмыс істеп келе жатқан «Ораз Ахун» қоғамдық бірлестігінің директоры Ақтолқын Нұрмағамбетованы әңгімеге тартқан едік.

– Ақтолқын Алтынбайқызы, сіздің ойыңызша біз осындай іс-шаралар арқылы ұлттық болмысымызды қалыптастырып, қазақы қалыпқа ене аламыз ба?
– «Тамшы тас жарады» деген бар. Ешкім ешқашан бір менің әрекетім ештеңе өзгерте алмас деген ойда болмауы керек. Түсінесіз бе, біз осындай бейқамдық ойдан арылмасақ, күндердің күнінде әрекетсіздігіміз барлық жетістігімізді шайып кетеді. Біздің әңгімемізге арқау болып отырған «Руханият керуені» жобасының мақсаты – діни экстремизм мен терроризмнің алдын алу, ұлттық, мәдени және отбасылық құндылықтарды кеңінен насихаттау, деструктивті діни ағым идеологиясына қарсы иммунитет қалыптастыру. Біз осы бағытта тұрғындармен, мектеп оқушылары мен ұстаздармен, арнаулы орта және жоғары оқу орны студенттерімен, қызметкерлерімен ұзын саны 40 кездесу ұйымдастырдық. Әрине, жауапкершілігі зор жұмыста тынымсыз еңбектенген жан ғана нәтижеге қол жеткізеді. Біздің ең бірінші байқағанымыз, ұлттық құндылық пен рухани иммунитет қана бәрін жеңе алады. Демек, жоғарыда айтқан әрбір мақсаттың түптің түбінде біздің бойымызда рухани иммунитет қалыптастырып жатса, біз талай «дертті» жеңеміз.
– Елмен кездесуде не айтылды? Ел алдына кімдер шықты?
– Әлбетте, халықтың алдына шығып жүрген азаматтар, үлгілі тұлғалар, қоғамның бірқатар салаларында өзіндік орны мен маңызы бар тұлғалар қатысты. Бір сөзбен айтқанда, айтары бар азаматтар. Олардың әрбірінің ұлттық құндылық, ұлттық болмыс, қазақы қалып турасында өзіндік ой-пікірлері бар және ол кездесуге қатысқан әрбір адамға ой салғаны анық. Мұндай құндылықтарды ту еткен жиындар алда да жалғасын таба беретіні айқын.
– «Тәрбие – тал бесіктен» деп жатамыз. Мұның барлығы ә дегенде отбасынан басталу керек шығар…
– Дұрыс айтасыз. Отбасы институты турасындағы тақырыптарға да біз тоқталдық. «Табалдырықтан биік тау жоқ» деген дана халқымыз ұлылықтың бастауы шаңырақтан екенін тап басып айтқан. Біздің спикерлердің әрбірінің осындай тақырыптарда айтар ойлары да салмақты. Сондықтан, осы жоба аясындағы 40 кездесу елге көп нәрсе бергеніне сенімдімін.
– Сұқбатыңызға рақмет.

Әңгімелескен Аян СПАНДИЯР