Қызылорда қалалық мәслихаты депутаттығына №6 бірмандаттық аумақтық сайлау округі бойынша кандидат Салмурзаев Асылбек Нұрланұлының сайлауалды бағдарламасы
Өмірдерек
Мен, Салмурзаев Асылбек Нұрланұлы 1987 жылдың 17 ақпанында Қызылорда облысының Жалағаш ауданына қарасты Аққұм ауылында дүниеге келдім. 2004 жылы Қызылорда қаласы, Талдыарал ауылындағы №215 орта мектепті бітіріп, Қорқыт ата атындағы Қызылорда мемлекеттік университетіне қабылдандым. Жоғары оқу орнын 2008 жылы «Бастапқы әскери дайындық және дене шынықтыру» мамандығы бойынша бітіріп шықтым.
Еңбек жолымды 2007-2010 жылдар аралығында Қызылорда гуманитарлық-экономикалық колледжінде дене шынықтыру пәні оқытушы болып бастадым. Ал 2010-2014 жыл Тәкей Есетов атындағы №264 мектеп-лицейінде дене шынықтыру пәні мұғалімі және дене шынықтыру пәні бірлестік жетекшісі болдым.
2014 жыл маусым айынан бастап Қызылорда қалалық дене шынықтыру және спорт бөлімі «Қажымұқан Мұңайтпасұлы атындағы спорт клубы» КММ-не баскетбол бөлімшесінің жаттықтырушысы, 2014 жылдың қазан айында Қызылорда қалалық дене шынықтыру және спорт бөлімі «Қажымұқан Мұңайтпасұлы атындағы спорт клубы» КММ әдіскері, 2017-2021 жылдары Қызылорда қалалық дене шынықтыру және спорт бөлімі «Қажымұқан Мұңайтпасұлы атындағы спорт клубы» КММ директордың оқу-ісі жөніндегі орынбасары кызметін атқардым.
2021-2024 жылдары Қызылорда қалалық дене шынықтыру және спорт бөлімі «Қажымұқан Мұңайтпасұлы атындағы спорт клубы» КММ-нің спорт кешен менгерушісі және грэпплинг бөлімшесінің жаттықтырушысы кызметін атқарсам, 2024 жылдың қазан айынан бастап Қызылорда қалалық дене тәрбиесі, спорт және туризм бөлімі Қажымұқан Мұңайтпасұлы атындағы спорт клубы КММ-де грэпплинг бөлімшесінің жаттықтырушысы, әдіскер кызметінде жұмыс атқардым.
2025 жылдын маусым айынан бастап Қызылорда қалалық дене тәрбиесі, спорт және туризм бөлімі Қажымұқан Мұңайтпасұлы атындағы спорт клубы КММ-де директор қызметін атқарып келемін.
Отбасылымын, екі бала тәрбиелеп отырмын.
Қымбатты жерлестер!
Спортшы көп сөзбен дос емес, ол – істің адамы. Бойымда осындай қасиет бар. Өйткені, адам өзінің әрекеті арқылы ғана кім екенін көрсете алады. Міне, осы болмысты бойымда ұстап келемін. Бас көтерген ел азаматтарымен бірге қалалық мәслихат депутаты болуға талабымды шыңдап, елге еңбек етуді мақсат етіп отырмын.
Халық қалаулысының мойнына артылар жауапкершілік пен міндетті жақсы білемін. Қоғамдағы көп саланың дамуына депутат ретінде үн қосып, мәселелердің шешімін табуына, түйткілдердің тарқауына атсалысқым келеді.
Адам мақсатсыз болмайды. Менің осы сайлау бағытында айқын мақсаттарым бар. Олардың көпшілігі спортпен тікелей байланысты.
Біріншіден, Қосшыңырау ауылдық округі мен Қарауылтөбе ауылынан арнаулы спорт кешенінің салынуына атсалыссам деймін. Бүгінде аталған елді мекендерде мұндай бағыттағы нысан тапшы. Жастар жоқтан бар жасап, өздерінің спорттық қабілеттерін шыңдап жүр. Ал спортпен айналысқан адамның қаншалықты мықты болатынын жақсы білесіздер. Оның үстіне Мемлекет басшысынан бастап барлық жерде бұқаралық спортты дамыту, салауатты өмір салтын ұстану қарқынды жүруде.
Екіншіден, мемлекеттің басты байлығы – адам капиталы. Біз халықтың өмір сүру сапасын жақсартып, денінің саулығының артуына атсалысуымыз керек. Бұл ретте Қарауылтөбе ауылының халқы басы ауырып, балтыры сыздаса, қалаға келуге мәжбүр. Ауылда амбулатория бар екені рас, бірақ оның шамасы ауылдың тек аз ғана бөлігіне жетеді. Сол себепті, мен Қарауылтөбе ауылына заманауи емдеу мекемесін салдыруға ықпал етемін. Халықтың алғысын арқалаған жанның алар асуы да мол екені даусыз.
Үшіншіден, халықтың тұрмыс-тіршілігінің, өмір сүру салтының дамуына коммуналдық саланың да тигізер ықпалы зор. Қаланың шет аймақтарында ауызсу, аяқсу, газ мәселесі бар екені рас. Қаланың ауқымы артып, шекарасы кеңейген сайын көпшілікке жеткілікті деңгейде бармай жатады.
Мәселен, ауызсу мәселесі. Арнайы насос қондырғыларын пайдаланғанның өзінде тамшылатып әрең алып отыр. Ондағы халықтың мәселесін жақсы білемін. Бұл жерде қосымша қондырғылар орнату арқылы мәселені шешуге болады. Мен билік пен халықтың арасына алтын көпір болып, осы түйіннің тарқауына атсалысамын.
Аяқсу мәселесі. Қалаға су әкелетін үлкен каналдың бойында тұрып, аяқсусыз отырғанымыз ұят. Сол себепті, мұның бір шешімі болуы керек. Жеке сектордағы тұрғындар өздеріне қажетті көкөністі өз ауласынан жұлып жегісі келеді. Ауласына аяқсу апарып берсек, халықтың қуанышын көріп, мол бақытқа кенелеріміз анық. Бұл мәселе әлі де басы ашық күйінде тұр.
Газ мәселесі. Шет аймақты газдандыру жобасы жүрген сәтте тұрғын үйлер саны әлдеқайда аз болатын. Кейін жан-жағындағы бос жерлерге үй салынып, олар көгілдір отынға қосылған сайын газ қысымы азая түсті. Бұл мәселені де қосымша қондырғылар арқылы шешуге, халықтың мәселесінің оң шешімінің табылуына атсалысуға әбден болады.
Төртіншіден, жол мәселесі. Шет аймақтар мен Қосшыңырау және Қарауылтөбе ауылдық округтерінде жол мәселесі түбегейлі шешілмегенімен бір жолға қойылған. Қазір ауылдық жердің өзінде бұрынғы жағдай жоқ. Тақтайдай тегіс асфальттар көбейген. Бірақ кейбір жолдарды жаңалау, кейбір жерлерге жол салу, ал тағы бір тұстарында жаяу жүргіншілер жолын салу мәселесі бар. Осы мәселелерді шешуге атсалысамын.
Бесіншіден, көркейту-көгалдандыру мәселесі. Кейінгі жылдарды жаз аптап ыстыққа айналғанда халық көлеңке іздеп сабылып кетіп жүр. Әсіресе, саябақтардың санын көбейтуіміз керек. Жаяу жүріп, серуендеп, бой жазғысы келген әрбір жанға жағдай жасалғаны ләзім. Міне, осы себептен көркейту-көгалдандыру ісін қолға алғым келеді.
Алтыншы мәселе, балалардың ойын алаңдары. Балалар қайда, қалай ойнарын білмей жатады. Ата-аналар кішкентай балаларды ойын алаңына апарып әрі серуендесе деймін. Әр көшеге бір ойын алаңы болмаса да, екі көшеге бір ойын алаңы, содан соң спорттық алаңдар болуы керек. Біздің келешегіміз бүгінгі өскелең ұрпаққа жасалған жағдайға байланысты. Біз оларға қаншалықты қолдау көрсетсек, ертеңгі күні олар солай еңбек етеді.
Құрметті сайлаушылар!
Мен үшін депутат болу – мансап не болмаса атақ пен абырой емес. Мен бұл жауапкершілікті елге еңбек ету, халықтың бағасын алумен өлшеймін. Демек, елдің сенімін ақтауға тырысып, бар күш-жігерімді саламын.
Сіздерді, маған дауыс беруге шақырамын!
Қаржысы республикалық бюджет қаражатынан төленді.


