Қызылорда облысында Есірткі қылмысына қарсы іс-қимыл басқармасының ұйымдастыруымен және Қызылорда облысының есірткі құқық бұзушылықтарының алдын алу жөніндегі кеңесінің қатысуымен «Мен өмірді қалаймын!» ұранымен өткізілген есірткіге қарсы авторлық өлең жазу және мәнерлеп оқу байқауының қорытындысы шығарылды.
Байқаудың негізгі мақсаты – өскелең ұрпақтың өз денсаулығына саналы көзқарасын қалыптастыру, салауатты өмір салтын насихаттау, нашақорлықтың алдын алу, сондай-ақ балалар мен жастар арасында рухани-адамгершілік құндылықтарды дәріптеу.
Байқауға Қызылорда облысының жалпы білім беретін мектептерінің оқушылары мен колледж студенттері арасынан барлығы 89 қатысушы қатысты.
Байқау шартына сәйкес қатысушылар адам өмірінің құндылығы, есірткісіз болашақ, денсаулық, арман мен мақсатқа ұмтылу тақырыптарында өз бетінше өлең жазып, авторлық туындысын мәнерлеп оқып, бейнеролик түсіріп, әлеуметтік желілерде жариялауы қажет болды.
Байқау өскелең ұрпақтың шығармашылық әлеуетін ашуға, өзіндік ойын еркін жеткізуге және белсенді азаматтық ұстанымын қалыптастыруға мүмкіндік берді. Қатысушылар өз туындыларында саналы таңдау жасаудың маңыздылығын, адам рухының беріктігін, өзін-өзі дамытуға деген ұмтылысын және жарқын болашаққа деген сенімін көрсете білді.
Байқау қорытындысы бойынша жеңімпаздар анықталды: І орын: Өмірзақ Диас (Қазалы ауданы, №266 орта мектеп-лицейі), Мергенбай Нәби (Жаңақорған ауданы, №54 орта мектебі). ІІ орын: Әбдіғаппар Қасиет (Жаңақорған ауданы, Дарынды балалар мектебі), Алпысбаева Аякөз (Қармақшы ауданы, №85 орта мектебі), Буребайұлы Сұңқар (Қармақшы ауданы, №80 мектеп-гимназиясы), Әмзен Қарақат (Қазалы ауданы, №266 мектеп-лицейі). ІІІ орын: Бақтыбай Айзере (Арал ауданы, №292 орта мектебі), Амангелдиева Жулдыз (Қармақшы ауданы, №85 орта мектебі), Таумуратов Нурдаулет (Қармақшы ауданы, №85 орта мектебі), Әділханқызы Наз (М. Мәметова атындағы Қызылорда педагогикалық жоғары колледжі), Ермағанбет Мұқағали (Жалағаш ауданы, №38 орта мектебі), Жұмажан Айару (Қызылорда қаласы, №23 мектеп-лицейі).
Осындай іс-шараларды өткізу жастар арасында есірткіге қарсы мәдениетті қалыптастыруға, адамгершілік құндылықтарды нығайтуға, өз болашағына жауапкершілікпен қарауға тәрбиелеуге және есірткі заттарының таралу мәселесіне қоғам назарын аударуға ықпал етеді.
Денсаулықты, арманды және жасампаздықты таңдау арқылы біз өмірді таңдаймыз!


