Ақтауда дәмхана басшысы құқығын талап еткен тұрғынды шашынан сүйреп қуып шыққан. Бұл туралы Stan.kz ақпарат агенттігі хабарлады.
Ақтаулық дәмханада “хот-догтың ішінен шаш табылды, басқасына ауыстырып бер” деген әйелге кәсіпкер анасымен бірге жабылып, күш көрсетіпті. Қазір полиция күдіктіні қамап, тергеуді бастады.
Бала-шағасымен 600 теңгелік хот-дог жеуге барған келіншек шыр-пыр болып, айналадағы адамдардан көмек сұраған. Барлық жайтты видеоға түсіріп алған әйел дәмхана басшылығы санитарлық талапты сақтаудың орнына өзін қорқытып, ұрып-соғып шығарып салғанын айтты. Сөзінше, кәсіпкер «біреудің тапсырмасымен келіп, күйе жағып отырсың» деп айыптаған.
Осы шудан кейін тамақтанатын орын уақытша жабылып, тергеу басталды. Соттың санкциясымен тұтынушысын балағаттап, зәбір көрсеткен азамат 2 айға қамауға алынды. Қазір полиция оқиғаның мән-жайын анықтап жатыр.
Фото: Видеодан скриншот