Текті адамға тәлімі санасы бар,
Әр туыстың өзіндік бағасы бар.
Құдайдан кейін саған пана болар,
Анаңның бауырлары нағашылар.

Жырым барда жаманға бой ұрмаспын,
Пірім барда ешқашан жойылмаспын.
Нағашым Қойшыбайдың Тәжмаханы,
Кетенің ішіндегі сойырғастың.

Терең ой, кемел келбет, сабыр мінез,
Кісі еді ұғынатын хәліңді тез.
Ойлаған елдің бірлік берекесін,
Қарт қайда нағашымдай қәзіргі кез.

Күн түні дастарханы жайылатын,
Айтары тірлігіңе лайық ақыл.
Үйіне келген ақын жыраулардың,
Астына ат мінгізіп қайыратын.

Отты көз, шырайлы сөз, нағыз білім,
Көненің көп білетін уағыз жырын.
Соғыс пен тылдың қайсар қаһарманын,
Ұлықтау ұрпақтарға парыз бүгін.

Ұл қызға тәрбиелі білім берді,
Қолтығынан демеді сүрінгенді.
Қариясы атанып Сырдың аңыз,
Шөберенің шырайлы түрін көрді.

Адал ұстап әрқашан ар-намысын,
Еңбек еткен ұрпақтың арманы үшін.
Қайран менің нағашым қайталанбас,
Алты Алаштың абызы, ардағысың.

Тағылымы тектінің тұмарындай,
Лағыл үні имамның құранындай.
Өнегелі өмірі нағашымның,
Бақытымның бағдаршам шырағындай.

Қалпын, даңқын, әлі айтып тұрады елі,
Менің өнер жолымның нұр әлемі.
Заманында алдына жан салмаған,
Құба төбел тірліктің құлагері.

Сыйлағанға басыңды ие білдің,
Әр ісіңді біздерге кие қылдың.
Арнауын қабылдаңыз нар нағашым,
Сырдың Серік ақыны, жиеніңнің.

Серік Ыдырыс,
ҚР Мәдениет саласының үздігі.
Қызылорда облысының Құрметті қызметкері.
«Ерен еңбегі» үшін медалінің иегері