Бүгін Қазақстан Республикасы Ұлттық ұланының барлық әскери бөлімдерінде 6655 әскери бөлімі әскери қызметшілерінің ерлігі мен қайсарлығына арналған «Мәңгілік сапта» акциясы өткізілуде.

2016 жылдың 5-ші маусымында Ақтөбе қаласында төтенше оқиға орын алып, барша елді дүрліктірген еді. Исламның атын жамылған бір топ қылмыскерлер қала ішінде ойран салып, ел қауіпсіздігіне қауіп төндірді. Қаскөйлер Ұлттық ұланның әскери бөліміне лаңкестік шабуыл жасап, қару-жарақ қоймасындағы қаруларды иемденіп алуды мақсат етті.
Өкінішке орай сол қарулы қақтығыс кезінде біз үш жауынгерімізден айрылып қалдық. Бүгін біз батырлардың ерлігі мен қайсарлығына құрмет көрсетіп, тағзым етеміз, олар ерліктің, азаматтық және әскери борышты орындаудың жарқын үлгісі болып келеді.
Қаза болған майор Майлыбаев Даниэль Ақарысұлының, кіші сержант Қалиев Берікжан Ерланұлының және қатардағы жауынгер Сапар Досбол Еркінбекұлының бүгін еске алу күні… тағзым ету күні.

Ұлттық ұлан ерлеріне…

Мінездері қайтпас қайсар қырағы,
Жауынгерлік отбасында құрады.
Ұлттық Ұлан жауынгері әрқашан,
Өз еліне қорған болып тұрады.

Ұлттық ұлан әр жігіттің мектебі,
Абыройы көк туындай көктегі.
Берген антын екі етпейтін ерлерім,
Еліміздің болашағы ертеңі.

Жауынгерлер ұрандатып бастармыз,
Жаңа топпыз қалдыратын аспанда із.
Елін жерін қорғайтұғұн әрдайым,
Ұлттық Ұлан ерлеріміз, жастармыз.

Жақсылық БЕРІКҰЛЫ,
 5547 әскери бөлімінің лейтенанты