ҚР Сауда және интеграция министрлігінің Сауда комитетінің төрағасы Әбілдабеков Айдар Ахметбекұлы Қызылорда облысына жұмыс сапарының аясында құрылысы жүріп жатқан «Ырыс» коммуналдық базарының жұмысымен танысты.

Сауда алаңы шамамен 2 400 шаршы метрді құрайтын бұл базар сауда-саттық қызметінен бөлек, өнімдерді сату үшін алдын ала дайындау цехын ашу арқылы жергілікті ауыл шаруашылық тауарларды іріктеу, жуу, буып-түю жұмыстарын атқарып, сапалы өнім ұсыну қызметтерін жүргізуге бағытталған.

Базар құрылысын салуға «Байқоңыр» ӘКК» АҚ мен «Техностнастка РемСервис» ЖШС бірлесіп 2,4 млрд теңге инвестиция салған. Базар іске қосылғанда 24 жаңа жұмыс орны ашылып, қосымша жергілікті ауылшаруашылық өнім өндірушілеріне 100 орын бөлінеді деп қарастырылуда.

Сонымен қатар, Айдар Ахметбекұлы қала орталығындағы бірқатар ірі сауда орындарымен танысып, әлеуметтік маңызы бар азық-түлік бағаларын тұрақтандыру мақсатындағы мәселелерді талқылады.

Бұған дейін ҚР Сауда және интеграция министрлігінің Сауда комитетінің төрағасы Айдар Ахметбекұлы облыс орталығындағы әмбебап және мамандандырылған сауда базарларының жай-күйімен танысқан болатын.

Фото: «Байқоңыр» әлеуметтік-кәсіпкерлік корпорациясының баспасөз қызметі