Шиелі ауданында көрнекті қаламгер, қоғам қайраткері Сәбит Мұқановтың 125 жылдығына арналған әдеби-сазды кеш өтті. Іс-шара Шиелі ауданының әкімі Айтбай Насриддинұлы Жандарбековтың қолдауымен ұйымдастырылып, мемлекеттік қызметшілердің қатысуымен өтті.
Іс-шара «Бұдабай Қабылұлы атындағы мәдениет және шығармашылық орталығында» өтті. Мақсаты — мемлекеттік қызметшілердің рухани әлеуетін арттыру, кітап оқу мәдениетін насихаттау, әдебиетке деген қызығушылығын ояту.
Кешті аудандық қоғамдық даму бөлімінің бас маманы Гүлшат Рысқалиқызы жүргізіп, кештің мазмұнын көрерменге терең жеткізді. Мемлекеттік қызметшілерден құралған шығармашылық топ Сәбит Мұқановтың шығармаларынан көркемсөз оқып, сахналық қойылымдар ұсынып, ән-жырмен әрледі.
Кеш барысында «Шиелі ауданы әкімінің аппараты» коммуналдық мемлекеттік мекемесінің персоналды басқару (кадр қызметі) бөлімінің басшысы Құттықыз Артыққызы, жазушы, Ақпарат саласының үздігі Елтай Назымханұлы, Шиелі аудандық әйелдер кеңесінің төрайымы Нәйла Әбілқасымқызы, ардагер ұстаз, ақын Айжамал Әбдіхамитқызы, ақсақалдар кеңесінің төрағасы Исабек Сәрсенбайұлы, Шиелі аудандық орталықтандырылған кітапханалар жүйесінің басшысы Гүлдана Көпболсынқызы және ұстаздар Бақытжамал Серқұлқызы, Коммуна Исмаиловна сөз алып, Сәбит Мұқановтың қазақ әдебиетіндегі орны туралы тебіреніспен ой бөлісті.
Бұл кеш – мемлекеттік қызметшілердің шығармашылық қабілеттерін жаңа қырынан көрсеткен тағылымды әрі мазмұнды мәдени іс-шара болды.
«Сөз – халықтың қымбаттан қымбат кені» кеші – өнер мен руханияттың үндескен, ұлттық құндылықтарды дәріптейтін мәдени алаңға айналды.