2024 жыл елімізде «Жұмысшы мамандықтар жылы» деп жарияланып, еңбек адамының мәртебесін көтеруге, техникалық және өндірістік сала мамандықтарының маңызын арттыруға ерекше көңіл бөлініп отыр. Бұл бастама – ел экономикасының нақты секторында еңбек етіп жүрген жандардың еңбегін бағалауға, жастарды жұмысшы мамандықтарын меңгеруге ынталандыруға бағытталған маңызды қадам.

Осыған орай, Шиелі ауданында табысты жүзеге асып жатқан өндірістік жобалар үлгі ретінде кеңінен насихатталуда. Солардың бірі – 2024 жылы іске қосылған құс еті өндіру кәсіпорны. Аталған жобаның басшысы – Гүлзада Құрманбаева. Ол бүгінде өз кәсібін жергілікті жерде дөңгелетіп, ауыл шаруашылығының ет бағытын дамытуға үлес қосып келеді.

Кәсіпорынның өндірістік қуаттылығы – айына 9 тонна құс еті, бұл шамамен 4500 дана құс өсіруге мүмкіндік береді. Өнім толықтай ішкі нарыққа бағытталған, яғни тұрғындарды сапалы, жергілікті өніммен қамтамасыз ету – жобаның негізгі мақсаты. Кәсіпорын қазіргі таңда 5 адамды тұрақты жұмыспен қамтып отыр, бұл өз кезегінде ауылдық жерлердегі жұмыссыздықтың азаюына оң әсер етуде.

«Кәсіппен айналысқым келеді» деген сөзді қазіргі таңда біраз адамнан естиміз. Бұл әрине қуантады. Бизнесті бастап, оны зерттеп, дамыту екінің бірінің қолынан келетін тірлік емес. Әр адам өз бастаған ісіңе жауапкершілікпен қарау арқылы ғана жоспарына қол жеткізеді. Қазір мемлекет жасайтын жағдай жетерлік. Бастысы бизнес план әзірлеп, жұмыс істеуге ниет болса болды. Осы мүмкіндікті пайдаланып, істерін домалатып отырғандар қанша.

– Кәсіппен айналысу керек дегенді біраз уақыттан бері ойластырып жүрдік. Әр істі бір бастап көргеннен, бір іске нақты тоқталуды жөн санадық. Қазір бастаған кәсібіміз өз жемісін беруде. Жұмыссыздар санын азайтамыз деген басты мақсатымыз да жаймендеп орындалуда. Бастысы – кәсіпке деген сұраныс бар» – дейді Гүлзада Құрманбаева.

Бұл жоба жұмысшы мамандықтарының тек қарапайым еңбек ғана емес, ел экономикасын алға сүйреуші күш екенін көрсетіп отыр. Құс өсіру – үлкен жауапкершілік пен кәсіби шеберлікті талап ететін сала. Мұнда әрбір еңбеккердің үлесі маңызды. Осы кәсіпорын үлгісінде біз жастарға еңбек ету, кәсіп ашу, өндірістік бағытта жұмыс істеудің нақты мүмкіндіктері бар екенін жеткізгіміз келеді.

Сала зерттеушілері құс шаруашылығы сала ретінде шамамен 4000 жыл бұрын Үндістанда пайда болған деп болжайды. Онда үйде өсірілген тауықтардан барлық басқа тұқымдар пайда болды деген болжам бар. Бүгінгі таңда құс шаруашылығы ауыл шаруашылығының перспективалы бағыты болып табылады. Ол қысқа мерзімде халықты өніммен қамтамасыз етіп, пайда табуға қабілетті.

Фото: Кәсіпкерлік және өнеркәсіп басқармасының баспасөз қызметі