Қызылорда облысы әкімінің орынбасары Шахмардан Баймановтың төрағалығымен балалардың қауіпсіздігін қамтамасыз ету мәселесіне арналған жиын өтті. Оған Қызылорда қаласы әкімінің орынбасары Бақытжан Омаров және жауапты мекеме басшылары онлайн режимде қатысты.
Күн тәртібінде балалардың су айдындарында шомылу кезіндегі қауіпсіздігі, жазғы демалыста бос уақытын тиімді ұйымдастыру, ата-аналар мен жауапты қызметтердің өзара байланысын күшейту мәселелері қаралды.
Суға шомылу маусымында орын алуы мүмкін қауіп-қатерлердің алдын алу, бақылаусыз аймақтарда балалардың жүруін болдырмау және ата-аналардың жауапкершілігін арттыру бағытында мәселелер жан-жақты талқыланды. Сонымен қатар, жол қозғалысы қауіпсіздігі, жазғы лагерьлердегі санитарлық талаптар мен тамақтану сапасы да тарқатып айтылды.
Бала қауіпсіздігі — ортақ жауапкершілік. Жиын соңында айтылған мәселелерге байланысты қала әкімінің орынбасары Бақытжан Омаров жауапты сала жетекшілеріне жүйелі жұмыстарды жүргізуді тапсырды.