Орталық алаңдағы әсем ән мен тәтті күй көңілді тербеп, жаныңа бір ғаламат сезім сыйлайды. Қорқыт атадан басталған қойылым көрермен жүрегінен жол тауып, ақындар мен жыраулар қара сөзден қаймақ терген. Кезекті мерекелік концертті мойынға алған қармақшылықтардың қарқынына қала тұрғындары да риза болысты.
Облыстың бас қаласы, Алаштың ғасыр бұрынғы астанасы Ақмешіттің тойына аудан өнерпаздарының мерекелік концерттері бірінен-бірі өтіп, талғам мен таңдаудың өзі қиынға соғып бара жатқан тәрізді. «Жыр қонған, Сыр тұнған қасиетті Қармақшы» аталған кешке «AMANAT» партиясы облыстық филиал төрағасы Алмасбек Есмаханов, Қармақшының тумасы, ақын Серік Ыдырысов, Қармақшы ауданы әкімінің орынбасары Самат Қыдырбекұлы қатысты.
Қадірменді қонақтар алдымен аудан халқы дайындаған көрмемен танысты. Мұнда Ақжар ауылының әкімі Нұржамал Тұрсынбаева бастаған зиялы қауымның сабадан қымыз сапырып, тостаққа шұбат құйған қазақы қонақжай болмысқа куә болдық.
– Биыл – Қызылорданың қазақ елінің астанасы болғанына 100 жыл. Оның үстіне, біз осыдан тура ғасыр бұрын ұлтымыздың ұлық атауын қайтарып алдық. Оған дейін біздің ұлтымыздың атауын бұрмалап, төменсітіп, түрлі үлгіде атап жүрген еді. Облысқа қарасты жеті аудан осы мерейтой қарсаңында күмбірлеген күйден, әсем әннен, мың бұралған биден жарысып, шашу шашып жатыр. Қорқыт бабамыз бен Марал бабамыздың әруағы қолдап, өнерімен өрге жүзген Қармақшы ауданының концерті жоғары деңгейде өтіп жатыр. Елде мәдениет саласын қолдау жақсы жолға қойылған. Аудандардан Руханият орталықтары ашылып, қызметін жалғастыруда. Мәдени дамуда Сыр елі республика бойынша көш бастап келеді, – деді А.Есмаханов.
Балқы Базары мен Дүр Оңғары, Кете Жүсіп пен Көшенейі соңына мұра қалдырған шайырлар шыққан өлкенің Ақмешітке тартуы ерекше. Құттықтау сөз алған аудан әкімінің орынбасары Самат Қы дырбекұлы тарихқа тоқталып, Сырдың бас қаласының дамуы аймақта көшбасшы екенін алға тартты. Ал ақын Серік Ыдырысов жүрекжарды лебізін өлең жолдарымен жеткізді.
«Кеткенімше мына жалған фәнидан,
Қармақшының әрбір сөзі – қағидам.
Қай жерінде жүрсем-дағы әлемнің,
Қармақшы елі – менің Мекке-Мәдинам», – деді ақын тебірене.
Өнер додасын тамашалауға келген халықтың қарасы қалың. Қасиетті мекеннің тумасы, Қызылорданың тұрғыны Серікбек Қасымұлы да өнерпаздармен бірге тұтас туған жері ере келгендей қуанды.
– Концерт өте керемет өтіп жатыр. Тарихтың тамырын тартып, қазақ өнерінің шоқтығын биіктеткен шара болды. Қармақшы – өнердің ту тіккен мекені. Туған жердің концертін көруге келіп, көңіліміз марқайып қалды, – дейді ол.
Дәулет ҚЫРДАН