Сырдағы ғасыр тойына сәні мен салтанаты үйлескен Сырдария ауданының өнерпаздары да үлес қосты. Қызылорданың астана болғанына 100 жыл толуына орай ұйымдастырылып жатқан облыстық өнер байқауына алыптарға алтын бесік болған Сырдария өнерпаздары ерекше дайындықпен келген. Орталық алаңға кіреберістен бастап ауданның шеберлерінің, суретшілері мен басқа да өнер иелерінің қолынан шыққан ғаламат туындылар көрмеге қойылыпты.
Орталық алаңда өткен ауқымды іс-шарада тұрғындарға Мемлекет басшысының тапсырмасымен бастау алған «Адал адам» тұжырымдамасының 7 бағыты бойынша және рухани-мәдени құндылықтардан ұйымдастырылған көрме ерекше туындыларға толы. Жиынға қатысқан Қызылорда қаласы әкімінің орынбасары Бақытжан Омаров, «АMANAT» партиясы Қызылорда облыстық филиалының төрағасы Алмасбек Есмаханов, халық қалаулылары, мәдениет саласының майталмандары алдымен көрмені тамашалады.
Мерекелік концертте Қызылорда қаласы әкімінің орынбасары Б.Омаров, Қазақстанның еңбек сіңірген әртісі, сырдариялық Б.Алпысбаев, Сырдария ауданы әкімінің орынбасары Д.Байдушев сөз сөйлеп, Қызылорда қаласының астана болғанына 100 жыл толу мерейтойымен құттықтады.
Өнер байқауында ауданның мәдениет майталмандары, Сәдуақасовтар халықтық отбасылық ансамблі, «Ұлағат» әкелер анасамблі, «Алтын қазына» ансамблі, «Ритм» вокалды-аспапты ансамблі, «Балауса» халықтық би ансамблдері, сондай-ақ ауданның талантты әншілері мен бишілері әсем ән мен күмбірлі күйден шашу шашып, көрермен ықыласына бөленді. Төгілген әрбір күй, әуелеткен ән мен мың бұралған би – туған жерге деген шынайы сүйіспеншіліктің, өнерге деген адалдықтың көрінісі болды.
Дәулет ҚЫРДАН
