Арал ауданы әкімі Аманжол Оңғарбаевтың төрағалығымен аппарат мәжілісі өтіп, күн тәртібіне сәйкес «Сумен жабдықтау және су бұру жүйелерін дамыту, суды үнемдейтін және цифрлық технологияларды енгізу шаралары» қаралып, ауданда жүргізіліп жатқан су тарту жұмыстары пысықталды.

Мемлекет басшысы 2025 жылдың соңына дейін тұрғындарды 100 пайыз сапалы ауыз сумен қамтуды тапсырғаны белгілі. Бүгінде бұл бағыттағы жұмыстар қарқынды жүргізілуде. Ауданға қарасты Тоқабай, Абай ауылдарына ауыз су тарту жұмыстары қарқынды қолға алынуда. Бұдан бөлек Ерімбетжаға және Тастүбек ауылдарын орталықтандырылған ауыз суға қосу жұмыстары жүруде.

Аудан әкімі бұл бағыттағы жұмыстарды ұдайы назарда ұстап, жұмысты бәсеңдетпеу керектігін жеткізді.

Сонымен қатар жыл сайын халқымыздың саны артқандықтан су тұтынуда ысырапшылыққа жол бермеу керектігін айтты.

– Құрметті әріптестер. Ауыз сумен қамту – ең өзекті мәселелердің бірі екендігі белгілі. Жыл сайын халқымыздың саны артып, су тұтыну көлемі де ұлғаюда. Осы ретте, су ресурстарын үнемдеп пайдалану өте маңызды. Бүгінде тұрғындар арасында суды үнемдеп пайдалану мәдениеті қалыптаспаған. Барлығы дерлік ауыз суды егістіктерін суаруға, есік алдына шашуға, көліктерін жууға ретсіз жұмсауда. Осы ретте, қала, кент және ауылдық округ әкімдері, халық арасында су үнемдеу шараларын қабылдау қажет, – деді аудан әкімі.

Жиын соңында атқарылуы тиіс жұмыстар бойынша жауапты тұлғаларға нақты тапсырма жүктеп, уақытылы орындалуын бақылауға алуды салаға жетекшілік ететін аудан әкімінің орынбасарына жүктеді.

Фото: Аудан әкімдігінің баспасөз қызметі