Қармақшы ауданына қарасты елді мекендер егіс алқабында күріш дақылдарынан бөлек, көкөніс, бақша егуді де қолға алғанына көп болды. Мәселен, Дүр Оңғар ауылындағы «Жаңажол» серіктестігі биыл 5 гектарға тек қана картоп еккен. Оның арғы жағында қауын-қарбыз, қызанақ-қияры тағы бар. Әртараптандырумен қатар, елге ең қажетті деген дақылдарды басты нысанаға алған бірнеше елді мекенге аудан әкімі Жандос Еркінбек ат басын бұрып, егіс жағдайына қанықты.

Алдымен Жосалы ауылдық округіндегі «Шабан ата» шаруа қожалығының егіс алқабына барып, бақша егу жұмыстарының барысын көрді. Мұнан кейін Жаңажол ауылдық округінде «Жаңажол» ЖШС-нің қашыртқы каналы мен су айдау құрылғыларының жұмысымен танысты. Сонымен қатар, серіктестіктің алма бағына барып, баптау жұмыстарының жай-күйін көрді.

Жұмыс сапары аясында аудан басшысы «Жаңажол» ЖШС-нің күріш алқабына да барып, егіс жағдайымен танысты. Шаруашылық басшыларымен пікір алмасып, мәселелер мен ұсыныстарды тыңдады.

Сапар қорытындысымен аудан әкімі сала мамандарына нақты тапсырмалар беріп, сапалы әрі нақты орындалуын бақылауға алуды тапсырды.

«QYRDAN-ақпарат»