Бүгін Қазалы аудандық ауыл шаруашылығы және жер қатынастары бөлімінің басшысы Е.Сейтов пен «Қазалысушар» өндірістік учаскесінің басшысы Н.Әбілдаев бірқатар шаруашылықтардың егіс алқаптарын аралады.

Атап айтқанда, «Агро Өркен» жауапкершілігі шектеулі серіктестігінің, сондай-ақ «Өте» және «Мерей» шаруа қожалықтарының күріш алқаптарында атқарылып жатқан жұмыстармен танысты. Аралау барысында су тапшылығының алдын алу, су үнемдеу шараларын ұйымдастыру және егіс жұмыстарының барысы пысықталды.

Сала мамандары тарапынан күріш алқаптарын тиімді әрі уақтылы суару мәселесі көтеріліп, шаруашылық басшыларына нақты ұсыныстар берілді. Сонымен қатар, егіс алқаптарына мал түсуінің алдын алу қажеттігі айтылып, бұл бағытта тиісті ауыл әкімдеріне бақылауды күшейту жөнінде тапсырмалар жүктелді.

Аудан бойынша биылғы жылы жалпы егіс көлемі – 18 245 гектарды құрап отыр. Оның ішінде 5 636 гектар жерге күріш дақылы орналастырылған. Бұл – аудан диқандары үшін маңызды көрсеткіштердің бірі.

Сала басшылары жүргізілген жұмыстарға оң бағасын беріп, су тапшылығы жағдайында тиімді әрі ұқыпты жұмыс жүргізудің маңыздылығын атап өтті. Сонымен қатар, егіс науқанын оңтайлы мерзімде аяқтауды тапсырды.

Фото: Қазалы ауданының ауыл шаруашылығы мен жер қатынастары бөлімі