Мәдениет адам қолымен жасалатын материалдық құндылық болса, тіл – ұлттық болмысымен қалыптасқан төл мәдениетіміз сақталған негізгі көздердің бірі. Яғни, тіл – мәдениеттің өмір сүру формасы болса, мәдениет – оның ішкі мазмұны. Сондықтан мәдениет мәселесін маздатып, тілдерді дамыту – еліміздегі мемлекеттік саясаттың аса маңызды бағыттарының бірі саналады. 

Бүгін  қала әкімдігінің баспасөз орталығында өткен брифингте қалалық мәдениет және тілдерді дамыту бөлімінің басшысы Жағыпар Тәжмаханов биылғы жылдың бірінші жартыжылдығында атқарған жұмыстар бойынша егжей-тегжейлі айтып берді.

– Қала әкімдігіне қарасты мемлекеттік мекемелерде құжат айналымы 100% мемлекеттік тілде жүргізіліп келеді. Бүгінде тарихи-мәдени мұра бойынша 85 нысан мемлекет қорғауында, биыл  8 ескерткіштің қорғау аймағы анықталды. Ономастика саласына келсек, қала аумағындағы 1279 көше атауы  нақтыланған.  Үстіміздегі жылы Ұлы Отан соғысы Жеңісінің 80 жылдығына орай 31 ұсыныс пен 7 тарихи тұлға атауы республикалық ономастика комиссиясына ұсынылды. Қазіргі таңда QR-кодпен жабдықталған жаңа көше аншлагтарын орнату жұмыстары жүргізілуде. Мәдениет үйлері мен клубтар, кітапхана, музей жүйесінде тиісті міндеттер толық орындалуда. Солардың ішінде Жастар театры репертуары 13 қойылымға жетті, оның 4-еуі жаңа премьера. Жалпы,  мәдениет пен тіл – ұлтты ұйыстыратын ұлы күш десек, бұл бағытта бөлім тарапынан жарты жыл ішінде 525 іс-шара өткізіліп, оған 130 391 көрермен қамтылды, – деді Жағыпар Айтбайұлы.

Айта кету керек, қалалық мәдени-демалыс паркінде қайта жаңғыртуя жұмыстары жүргізіліп, скейтпарк, аттракциондар, амфитеатр, воркаут алаңы, су бұрқақтар, түрлі бақтар және т.б. нысандар іске қосылды.