Қармақшы ауданында биыл 26 мың гектарға жуық жерге дән тасталды. Оның жартысынан көбі күріш дақылы. Бүгінге дейін ауданға берілген су лимитінің 65 пайызы игерілген. Аудан әкімі Жандос Еркінбек су деңгейінің төмендеуіне байланысты шаруашылықтар арасында кезектестіріп суару жүйесі қолға алынғанын айтты.
– Макроэкономикалық көрсеткіштердің басым бөлігі ауыл шаруашылығы саласындағы жетістіктерге байланысты. Биыл 13097 гектар – күріш, 1000 гектар – жаздық бидай, 1200 гектар – мақсары, 2 гектар- күнбағыс, 8950 гектар – жоңышқа, 39 гектар – сүрлем жүгері, 56 гектар – судан шөбі, 1180 гектар – картоп, көкөніс, бақша дақылдарын ектік. Аудан бойынша биылғы су лимиті 509 млн текше метр болса, бүгінгі уақытқа дейін 329 млн текше метр су егістікке алынып, су лимитінің 65 пайызы пайдаланылды. Судың деңгейі былтырғыдан аз болуына байланысты су тапшылығын алдын алу мақсатында аудандар бойынша кезектілік кестесі жасалып, бекітілді, – деді Жандос Еркінбекұлы.
Айта кетейік, 2025 жылы Шардара су қоймасында судың аз көлемде жиналғанына байланысты 2024 жылмен салыстырғанда 1670 млн текше метрге төмен. Сондықтан облыс әкімінің орынбасары Бақыт Жақановпен келісімді түрде кесте бекітілген. Кезектілік кестесіне сәйкес ағымдағы жылдың 9-15 шілде аралығында Қармақшы және Жалағаш аудандарында секундына 55,3 текше метр су алу керек болса, нақты есеп бойынша секундына 49,2 текше метр су кіруде.
– Егіншілікті қажетті сумен қамтамасыз ету және жайылымдық жерлерді суландыру мақсатында биыл республикалық бюджеттен 27 млн теңге қаржы қаралып, Қуаңдария ауылдық округі аумағында орналасқан «Таңатар» каналын механикалық тазалау жұмыстары жүргізілуде. Бұл жұмыстар қыркүйек айында аяқталады деп жоспарлануда, – деді аудан әкімі.
Ауданда мал шаруашылығында да өсім бар. 2025 жылдың қаңтар-шілде айларында 37 725 бас мүйізді ірі қара, 65 548 бас қой мен ешкі, 19 339 бас жылқы, 4 587 бас түйе, 23 137 бас құс тіркелген. Өткен жылдың есепті кезеңімен салыстырғанда мүйізді ірі қара 132,2 пайызға, қой мен ешкі 108,4 пайызға, жылқы 106,6 пайызға, түйе 101,5 пайызға, үй құстары111 пайызға көбейді.
«QYRDAN-ақпарат»