Жалағаш ауданында денсаулық сақтау саласы жылдан жылға қарқынды дамып келеді. Соңғы үлгідегі ауруханалар мен жаңа типтегі емханалардың салынуы аудан тұрғындарының сапалы медициналық көмек алуына мүмкіндік беріп отыр. Бұл туралы Өңірлік коммуникациялар қызметінің ақпарат алаңында аудан әкімі Ардақ Ибраимов мәлімдеді.
– Денсаулық сақтау – халықтың әл-ауқатын арттырудағы ең маңызды салалардың бірі. Біздің басты мақсатымыз – тұрғындарға сапалы әрі қолжетімді медициналық қызмет ұсыну. Осы бағытта жүйелі жұмыстар жүргізілуде. Жақында республикалық бюджет есебінен Қаракеткен ауылдық округінде жаңа дәрігерлік амбулатория бой көтеріп, ел игілігіне пайдалануға берілді. Бұл нысан заманауи құрал-жабдықтармен толық жасақталған, сондықтан ауыл тұрғындарына алғашқы медициналық көмек көрсету сапасы бұрынғыдан әлдеқайда жақсарды. Бұдан бөлек, аудан орталығы мен ауылдық жерлердегі денсаулық сақтау нысандарын кезең-кезеңімен жаңғырту жұмыстары қолға алынып жатыр. Жаңа аурухана мен емханалардың ашылуы – тек заманауи ғимараттар ғана емес, сонымен қатар білікті мамандардың жұмысына жағдай жасау және халықтың денсаулығын жақсартуға бағытталған кешенді қадам. Болашақта да осы бағыттағы жұмыс жалғасып, медициналық қызметтің сапасы үздіксіз жетілдіріледі, – деді Ардақ Әбдіғаппарұлы.
Жалағаш ауданында халықты сапалы ауыз сумен қамту және электр желілерін жаңғырту бағытындағы жұмыстар жүйелі түрде жүргізілуде. Қазіргі уақытта аудан халқы толықтай орталықтандырылған ауыз сумен қамтылған. Сонымен қатар инфрақұрылым сапасын арттыру үшін жаңа жобалар қолға алынуда.
– Халықты таза ауыз сумен қамтамасыз ету – басты назарда. Бүгінгі күні аудан тұрғындары 100 пайыз орталықтандырылған ауыз сумен қамтылған. Биыл Есет батыр елді мекенінде ауыз су жүйесін қайта жаңғырту жұмыстары басталды. Жоба құны 388 млн теңге болса, алғашқы кезеңге бюджеттен 38 млн теңге бөлініп отыр. Электр жүйелерінің жағдайын жақсарту бағытында да жұмыстар қолға алынды. Қазір аудандағы электр желілерінің ұзындығы 450 шақырымнан асады, олардың тозу деңгейі 30 пайыз шамасында. Осыны ескере отырып, Жалағаш кенті мен Еңбек, М.Шәменова ауылдарының электр желілерін жөндеу үшін жобалық-сметалық құжаттар дайындалуда. Бюджеттен шамамен 1,6 млрд теңге қаржы бөлу жоспарланып отыр. Бұл жұмыстар электрмен жабдықтау сапасын арттыруға және елді мекендердің инфрақұрылымын жақсартуға мүмкіндік береді, – деді Ардақ Әбдіғаппарұлы.
Жалағаш ауданында әлеуметтік салада оң өзгерістер байқалып, халықты жұмыспен қамту және жаңа жұмыс орындарын ашу бағытындағы шаралар жүйелі түрде жүзеге асырылуда. Бұл – тұрақты даму мен тұрмыс сапасын жақсартудың маңызды бөлігі.
– Әлеуметтік салада жақсы өзгерістер бар деп айтуға толық негіз бар. Ағымдағы жылы жалпы жұмыссыздық деңгейі 4,8 пайызды құрады, жастар арасында бұл көрсеткіш шамамен 4 пайызды құрап отыр. Ұлттық жобалар аясында 16 жоба арқылы 160 адамды жұмыспен қамту жоспарланған. Қазіргі таңда 7 жоба бойынша 95 адам жұмысқа орналастырылып, бұл жоспардың 59 пайызын құрайды. Ауданда әлеуметтік жағдайы төмен отбасыларға арналған қайырымдылық шаралары тұрақты түрде өткізіліп келеді. Бұл жұмыстар осал топтарға қолдау көрсетіп, олардың өмір сапасын жақсартуға бағытталған. Жұмыссыздықты төмендету және тұрғындардың экономикалық белсенділігін арттыру үшін кәсіпкерлікті қолдау және жаңа бизнес бастамаларын дамыту басты басымдыққа ие. Аудандық билік осы бағытта нақты шараларды жүзеге асырып, тұрақты жұмыс орындарын ашу үшін күш салуда, – деді аудан әкімі.
