ҚР Парламенті Сенатының депутаты Наурызбай Байқадамов Жаңақорған ауданындағы жұмыс сапарында «Руханият» орталығында аудан жастарымен кездесті.

Кездесуге аудан әкімі Мажит Самитов, аудандық мәслихат төрағасы Ғалымжан Жарқынбек Ғалымжан, аудандық жастар ресурстық орталығының директоры Наурызбай Орынбасаров, «AMANAT» партиясы жанындағы «Жастар рухы» жастар қанатының мүшелері қатысты.

Басқосуда Сенат депутаты елдегі әлеуметтік — экономикалық жағдай, мемлекеттік жастар саясатына бағытталған түрлі бағдарламалардың іске асу барысы, заңнамадағы соңғы өзгерістер мен қабылданған заңдардың маңызы туралы айтып өтті.

Сонымен қатар, Мемлекет басшысының алға қойған міндеттері мен даму стратегиясы, ұлттық тәрбие жөнінде біршама маңызды мағлұматтар беріліп, аудан жастарымен ашық пікір алмасу жүргізілді. Қатысушылар өз сұрақтарын қойып, ұсыныстарын ортаға салды.

Кездесу ашық пікір алмасу форматында өтіп, қоғам мен мемлекеттік органдар арасындағы сындарлы байланысты нығайтуға бағытталды. Кездесу соңы жеке қабылдаумен жалғасты.

Бұдан соң Сенат депутаты Наурызбай Сейтқалиұлы Шалқия кенті аумағындағы «Engineering & Construction Company» («ЕСС») ЖШС нің Асфальт зауытының жұмысымен танысты. Бұл жобада дайын асфальт өнімдері шығарылады. Қазіргі уақытта қажетті құрал — жабдықтары алынып, құрылыс жұмыстары жүргізілуде. Жоба бірыңғай индустрияландыру картасына енгізілген. Жоба құны 700 млн. теңге. Бүгінгі таңға құрылыс жұмыстарының 95% аяқталды. Зауыт іске қосылған кезде сағатына 160 тонна асфальт өндіреді деп күтілуде.