Баспана алуға бағытталған бағдарламалар тұрмысты түзеуге түрткі. Осы орайда, ҚАЖ департаментіне қарасты  №68 мекемесіне “Отбасы банктің” қаржы кеңесшісі Гүлнұр Салхадинова келіп, жеке құрам қызметкерлеріне керекті кеңес айтты.

Кездесу барысында тұрғын үй алу жайына тоқталып, жарна жинаудың оңтайлы тәсіліне де ойысты. Арнайы келген маман жеңілдетілген бағдарламалар жайында да бүге-шүгесіне дейін түсіндіріп, білгенімен бөлісті. Үй алуға ниетті қызметкерлер көкейінде жүрген сан сауалын қойып, мардымды жауап алды.

– Баспана бұйырып жатса, бір бақ. Өйткені, жайлы өмір сүрудің жайы құтты қонысқа байланысты. Бүгінгі кездесуде бағдарламалардың айырмашылығын, оның шартын, қайсысы табыс пен отбасылық жағдайға сай келетінін түсіндік. Енді ерте қамданып, үйлі болуға нық қадам жасамақпын. Мұндай келелі кездесулер қызметкерлер үшін маңызды, — дейді әділет сержанты Қ.Дүкенбаев.

Әлеуметтік қолдаудың қызмет сапасына да әсер ететіні анық. Алдағы уақытта да пайдалы ақпарат ұсыну жұмысы үзілмейді.