Діни экстремизм және терроризмді насихаттау тұрмақ, мұндай бағыттағы посттар мен жазбалардың астына пікір жазу да қауіпті. Қызылордада мектеп оқушысы осылай пікір жазғаны үшін жазаланды.
Қызылорда облысының дін істері басқармасы интернет кеңістігінде діни экстремизм және терроризм идеяларының насихатталуы бойынша мониторинг жұмыстарын тұрақты түрде жүргізеді. Шілде айындағы мониторинг барысында әлеуметтік желілерде экстремистік идеяларды насихаттайтын пікір қалдырған кәмелеттік жасқа толмаған 2009 жылы туған мектеп оқушысының жазбасы назарға алынды.
Қазақстан Республикасы Ұлттық қауіпсіздік комитетінің Қызылорда облысы және Байқоңыр қаласы бойынша департаменті, облыстық полиция департаменті, облыстық дін істері басқармасы, Қазақстан мұсылмандары діни басқармасы қызметкерлерінің, аталған азамат оқитын мектеп директорының тәрбие ісі жөніндегі орынбасарының қатысуымен кәмелеттік жасқа толмаған Д.М.-пен және оның ата-анасымен түсіндірме жұмысы жүргізілді.
Дегенмен, оның кәмелеттік жасқа толмағандығы ескеріліп, әкесі Н.Ш.-ке «Қазақстан Республикасы Әкімшілік құқық бұзушылық туралы кодекстің» 803-бабына сәйкес хаттама толтырылып, 127-баптың 1-бөлігінде көрсетілген құқық бұзушылықтарға сәйкес 10 АЕК мөлшерінде айыппұл тағайындалды.
Д.М.-нің ата-анасы ұлының әлеуметтік желідегі әрекеттерінен бейхабар екендігін, алдағы уақытта мұндай қателіктерге жол берілмейтіндігін айтып, баласының интернет кеңістігіндегі және әлеуметтік желілердегі парақшаларын өшіріп, экстремистік бағыттағы сайттарға кірмейтіндігін жеткізді.
Айта кету керек, Д.М.-нің теріс идеологияны насихаттайтын интернет сайттарына кіргені үшін 2023 жылы ауызша ескерту берілген.
Дәулет ҚЫРДАН