Қызылорда облысында Конституция күні мен Қазақстан халқы Ассамблеясының 30 жылдығына орай «Қуатты қаламгер» табиғаттағы тимбилдингі өтті. Оны Қызылорда облыстық ҚХА жанындағы Журналистер мен сарапшылар клубы ұйымдастырды. Шара Rancho_83_kzo демалыс орнында өткізіліп, аймақ қаламгерлерін, журналистерін және сарапшыларын біріктірді.
Мерекелік басқосу салтанатты түрде ашылып, алғашқы құттықтау сөзді Қызылорда облыстық қоғамдық даму басқармасының «Қоғамдық келісім» КММ директорының орынбасары Руслан Құрманов пен клуб төрағасы Елена Рыбина айтты. Олар клуб журналистерінің ел бірлігін нығайтудағы, этножурналистиканы дамытудағы еңбегін ерекше атап өтті.
Жыл басынан бері өңірлік Ассамблея қызметін жариялап, этносаралық татулықты насихаттаған қаламгерлер мен сарапшылар арнайы алғыс хаттармен марапатталып, бағалы сыйлықтар табысталды. Бұл – қоғам дамуына үлес қосқан БАҚ өкілдеріне көрсетілген құрметтің белгісі болды.
Шараның ең қызықты бөлігі – шығармашылыққа толы командалық ойындар болды.
• «Жедел жаңалық» кезеңінде қатысушылар ойдан шығарылған тосын оқиғалар жайлы қысқа сюжет әзірледі.
• «Шаңырақ көтеру» ойынында көздері байланған ойыншылар бірігіп шаңырақтың бейнесін құрастырды. Бұл тапсырма ұйымшылдық пен сенімнің сынға түсер сәті болды.
• «Қырық өтірік репортажы» барысында журналистер «шоколадтан жасалған қала», «Қызылордада ескерткіштер тіріліп, халықпен тілдесті» секілді қиялға толы сюжеттер дайындап, арнайы репортаж жасап, қатысушыларды күлкіге қарық қылды.
• Соңғы ойын – әріптерден жылдам сөз құрау сайысы да қатысушылардың тапқырлығы мен шапшаңдығын сынады.
Тимбилдинг соңында басты жеңіс – достық болды. Шара әрі қарай татулық пен бірлікті дәріптеген мерекелік дастархан басында жалғасын тапты.
Тимбилдинг шарасында Республикалық «Казахстанская правда» газетінің Қызылорда облысындағы меншікті тілшісі Әлібек Байшүленов, «Qazaqstan» ұлттық телеарнасының Қызылорда облысындағы меншікті тілшісі Әділбек Жақанов пен облыстық «Qyzylorda» телеарнасының бас редакторы Айнұр Тұңғышбаева өңірлік Ассамблеяның журналистерге көрсеткен құрметіне ризашылық білдірді.
«Қуатты қаламгер» тимбилдингі шығармашылық пен татулықты дәріптеген, журналистердің ынтымағын арттырған мәнді кездесу болды.