«Отанды сүю – иманнан» дейді дана халқымыз. Ел арасында отансүйгіштікті насихаттауда теолог мамандардың ықпалы ерекше. Дін мен дәстүрін бөліп жармаған қазақ үшін бұл ұғым маңызға ие. Таяуда елге белгілі исламтанушы, дін мәселелерін жөніндегі республикалық ақпараттық-түсіндіру тобының мүшесі, Ұлытау облысы діндерді зерттеу орталығының теолог маманы Елдос Жұмаділда өңірде іссапарда болды.

Дін саласының маманы аймақтағы бірқатар мекемелерде, мешіттерде, оқу орындарында түрлі контингент өкілдерімен кездесулер өткізді. Кездесулерде жастардың Отанға деген сүйіспеншілігі, қызмет етуі, жарқын болашағы үшін білімін үшін арттыруына тоқталып, қоғамдағы діни тұрақтылықты сақтау және нығайту, теріс діни идеологияның ықпалынан сақтанудың маңыздылығын атап өтті.

Елдос Қуандықұлының қатысуымен «Ақмешіт-Сырдария» орталық мешітінде құптан намазы алдында, қалалық «Сұлтан» мешітінде бесін намазы алдында жамағатқа уағыз-насихат жүргізілді. Сонымен қатар, Қызылорда медициналық жоғары колледжінде, «Болашақ» университетінде, И.Әбдікәрімов атындағы Қызылорда политехникалық жоғары колледжінде студент жастармен кездесулерде жастардың дін бағытындағы көкейтесті сұрақтарына жауап берді. Үстел теннисі орталығында спорт саласының мамандарымен және бапкерлерімен жүздесу ұйымдастырылып, жас спортшыларға тек денені емес, рухты да шынықтыру, ұлттық құндылықтарды көбірек шыңдау жайлы айтылды. Әскери-техникалық мектеп сарбаздарымен өткізілген кездесуде патриотизм, рухани тәрбие және діни білімнің өзара байланысы кеңінен талқыланды. РАТТ мүшесі әлеуметтік осал топтарға жататын азаматтармен кездесу бағытында «Тең қоғам» орталығында болды. «Мансап» жеке мектебінде мұғалімдермен, жоғары сынып оқушыларымен, Жастар ресурстық орталығында білім, спорт, әлеуметтік сала қызметкерлерімен, еңбек мигранттарымен кездесулер ұйымдастырылды.

Теолог Қармақшы ауданында іссапарда болып, «Қармақшы ата» мешітінде мешіт жамағаттарымен жүздесіп, «Руханият орталығында» аудан тұрғындарымен кездесті.

Дәулет ҚЫРДАН