Бүгін Сыр өңірінің бас имамы Дастан Жанасұлы грек-рим күресінен әлем чемпионы Айдос Сұлтанғалиға құрмет көрсетті.
Қызылорда облыстық «Ақмешіт-Сырдария» орталық мешітінде жұма намазына жиналған жамағат алдында бас имам әлемдік аренада көк туымызды көкке көтерген жерлесімізге алғысын білдіріп, дәстүрге сай иығына шапан жапты.
Айдос Сұлтанғали жуырда Хорватия астанасы Загреб қаласында өткен ересектер арасындағы грек-рим күресінен Әлем чемпионатында топ жарып, қазақ спорты тарихында бұл спорт түрінен XXI ғасырдағы тұңғыш әлем чемпионы атанды.
Айта кетсек, грек-рим күресінен әлем чемпионатының алтын жүлдесін елімізге соңғы рет 1999 жылы Грекияның Афины қаласында өткен дүбірлі додада Мхитар Манукян (63 кг) алып келген болатын. Араға 26 жыл салып, Айдос Сұлтанғали осы жеңіс жолын жалғастырып, теңдессіз жетістікке қол жеткізді.