Жастарды қолдау – болашаққа инвестиция дегенді көп айтамыз. Бірақ шын мәнінде ол тек инвестиция емес, ол халықтың өз-өзіне деген сенімі. Өйткені елдің болашағын бүгінгі жас буыннан бөлек қарастыру мүмкін емес. Осы тақырыптарды талқылап, елдің ертеңі деп сенген жасқа дем беріп, ашық талқылау ұйымдастыру барысында Жалпыұлттық социал-демократиялық партиясының Қызылорда облыстық филиалы мен Қызылорда облысының “Жастар ресурстық орталығы” өзара ынтымақтастық жөніндегі меморандумға қол қойды.
Меморандум жастардың ой еркіндігін ашуға, олардың азаматтық белсенділігін арттыруға, кәсіби, шығармашылық және қоғамдық әлеуетін дамытуға бағытталған. Қағазға түскен әр жолдың артында үлкен мақсат, әр тармақтың түбінде жастарға сенім жатыр.
ЖСДП Қызылорда облыстық филиалының төрағасы, облыстық қоғамдық кеңес мүшесі Нұрбек Дәуренбеков жастар бүгін ғана емес, бұған дейін де ел мәселелеріне ертеден араласқанын тілге тиек етіп, оларға сенімі жоғары екенін білдірді.
– Үміт деген ұлы ұғым бар. Ол әрбір халықтың, әрбір елдің жүрегінде сақталады. Үміт ол арманнан басталады, еңбектен жалғасады, нәтижеден көрінеді. Біз сіздерге үлкен үміт артамыз. Бұл үміттің салмағы да, қасиеті де ерекше. Үміт деген – тек сенім емес, ол – жауапкершілік. Әрқайсыңыздың қолыңыздағы бір кітап, әрбір игерген кәсіп, әрбір атқарған іс – елдің болашағын айқындайды. Біз тарихтан білеміз, ұлы тұлғалардың көбі жастық шағында-ақ елдің тағдырын шешер қадамдар жасаған. Абай өзінің ойларын жиырмасында толғады, Шоқан ғылымға жас шағында ден қойды, Жамбыл жырын елге ерте таратты. Демек, жастық шақ – тек ізденіс уақыты емес, ол – ұлттың бағытын айқындайтын кезең. Сол себепті сіздерге артылар сенім де зор, — деді Нұрбек Сағатұлы.
Жиында сөз алған орталық директоры Әліби Басаров жастарға арналған орталықтың миссиясын былай түсіндірді. Оның айтуынша, Жастар ресурстық орталығы – жастарға бағыт көрсететін, жаңа идеяларын жүзеге асыруға мүмкіндік беретін, олардың жан-жақты дамуына жол ашатын кеңістік.
– Жастар ресурстық орталығының әрбір бөлмесі, әрбір алаңы жас буынға арналды. Мұнда жастар пікірталасқа да, өнерге де, білімге де, кәсіпке де жол таба алады. Біз үшін маңыздысы – әр жас өзін осы қалада қажет, қолдаулы сезінуі. Жастардың арманы бар жерде қоғамның болашағына деген сенім де бар. Сондықтан біз әрбір бастаманы құнттап, қолдауға әзірміз. Мұнда тек жастардың бастамаларына қолдау білдіріп ғана қоймай, мемлекеттік бағдарламаларды жүзеге асыруға, оны жастар арасында насихаттап, ақпараттандыруға да белсенді күш саламыз. Осы арқылы бүгінгі буын өзіне жасалып жатқан жағдайдан хабардар болып ғана қоймай, оны өз игілігіне пайдаланады деп сенеміз, — Әліби Басаров.
Жастар орталығының басшысы аймақ жастарына жасалып жатқан мүмкіндіктерге де тоқталды. Қазір қалада заманауи кітапханалар, коворкинг орталықтар, спорт кешендері мен шығармашылық алаңдар жұмыс істеп тұр. IT-білім беретін арнайы орталықтар ашылып, кәсіпкерлікке қызығатын жастарға мемлекеттік бағдарламалар арқылы қолдау көрсетілуде. Оның айтуынша, жыл сайын ұйымдастырылатын мәдени фестивальдер, спорттық жарыстар, білімге қатысты байқаулар жастардың өзін көрсетуіне мүмкіндік береді. Форумдар мен ашық диалог алаңдары жас буынның ой-пікірін қоғамға еркін жеткізуіне жағдай туғызды.
Осы тұста ЖСДП ҚОФ төрағасы сөзін былай қорытты: «Жастардың жетістігі – елдің жетістігі. Олардың арманын қолдау – мемлекеттің болашағына үлес қосу. Біз әрқашан жастарға серік болуға дайынбыз. Өйткені жаңа заманның үміті – жастардың қолында. Ал біздің парызымыз – сол үміттің ақталуына жол ашу».
Басқосуға жиылған жастар қос мекеменің ортақ жобаларына арналған ынтымақтастық жөнінде жасалған меморандумына қол қою сәтіне куә болып, алдағы уақытта жаңа жобалардың бастау алатынына, тың серпіліс тудыратынына сенім білдірді.
ЖСДП Қызылорда облыстық филиалының Баспасөз қызметі