Қызылорда облысында 20 қазан мен 19 қараша аралығында өткізіліп жатқан «Браконьер» жедел-профилактикалық іс-шарасы барысында табиғатты қорғау және заңсыз аңшылықтың жолын кесу бағытында бірқатар тексеру жұмыстары жүргізілуде.
Іс-шара аясында полиция қызметкерлері аңшылықпен айналысатын азаматтардың атыс қарулары мен тиісті құжаттарының бар-жоғын мұқият тексеріп, құқықбұзушылықтың алдын алуға күш салуда.
Нәтижесінде, үш күн ішінде Қызылорда облысы Полиция департаментінің Қоғамдық қауіпсіздік басқармасы Қару айналымын бақылау және табиғатты қорғау тобының қызметкерлері Арал ауданы, Райым елді мекенінің маңында рейд жүргізу барысында азаматтың заңсыз түрде 17 үйрек пен 38 қасқалдаққа ұқсас құсты атып алғанын анықтады. Аталған дерек бойынша ҚР ҚК-нің 337-бабы 1-бөлігімен (Заңсыз аңшылық) қылмыстық іс қозғалды.
Сонымен қатар, басқа елді мекендерде жүргізілген тексеру нәтижесінде Ішкі істер органдарында тіркеуде жоқ екі дана 16 калибрлі аңшы мылтығы анықталып, ҚР ӘҚБтК-нің 482-бабының 1-бөлігімен (Қаруды заңсыз сақтау, алып жүру) әкімшілік іс қозғалды.
