Республика күніне орай жастардың шығармашылық қабілетін дамыту, олардың бойындағы тапқырлық пен көшбасшылық қасиеттерін қолдау мақсатында Жетісу облысының «Жайдарман» ойындарынан әкім кубогі өтті.

Бұл сайыс – облыс жастарының көптен күткен өнер додасы болды. Биылғы маусымда 11 команда қатысып, өзара әзіл мен тапқырлықта, сахналық мәдениет пен актерлік шеберлікте бақ сынады. Әр команда қоғамдағы өзекті мәселелерді әзіл арқылы жеткізіп, көрермен көңілін көтерумен қатар, ой саларлық мазмұн ұсынды.

Сайыс қорытындысы бойынша «SU» құрамасы І орынның биігін бағындырса, «Энерго» командасы ІІ орынды еншіледі. Ал үздік үштікті түйіндеген «Қыздар-Ай» болды.

Сонымен қатар көрермен көзайымы атанып, сахнада ерекше өнер көрсеткен Тұмар командасының ойыншысы Бекзат «Ең үздік ойыншы» номинациясы бойынша арнайы ақшалай сыйлыққа ие болды.

– Жетісу облысы әкімінің кубогі – бұл тек әзіл сайысы ғана емес, жастардың мәдени, шығармашылық және креативті ортасын қалыптастыруға бағытталған үлкен сахналық жоба. Шара жастардың талантын ашып, олардың шығармашылық қабілетін одан әрі дамытуға зор мүмкіндік берді, – дейді ұйымдастырушылар.

«QYRDAN-ақпарат»