Сырдария ауданының орталығынан оңтүстік-шығысқа қарай бет алғанда Аманкелді, Айдарлы, Жетікөл ауылдары орналасқан. Үш ауылдың халық санын қосқанда алты мыңға жетпейді. Шағын ауыл болғанымен, бұлардың әрбірінің түп төркінінде тұтас тарих жатыр. Қаракөл қойын өсіруді негізгі кәсібіне айналдырған елді мекендер болатын. Бүгінде мұндағы жұртшылықтың көпшілігі мал, егін шаруашылығынан қол үзбеген.
Аудан әкімі Берік Сәрменбаев есепті кездесуді атакәсіптен алыстамаған осы елді мекен тұрғындарынан бастады.
Жиынға аудандық ардагерлер кеңесінің төрағасы Мұса Келдібаев, аудандық Қоғамдық кеңес төрағасы Марат Еспенбетов, аудандық мәслихат депутаттары, құқық қорғау мен дербес бөлім, мекеме басшылары қатысты.
Үш ауылдың әрбірінде де ауыз толтырып айтарлық ауқымды жұмыс бар. Мәселен, биыл Айдарлы ауылында 11,7 млн теңгеге ойын алаңы салынса, елді мекенді аяқ сумен қамтамасыз ету мақсатында «Ақтам» каналы тазартылды. Ал Жетікөл ауылында осы жылы К.Бимаханов, Абай, К.Тасыров көшелеріне, Аманкелді елді мекенінде Қызылту 1 және 2 көшелеріне қиыршық тас төселді.
Жиында Берік Әбдіғаппарұлы өңірде атқарылып жатқан жұмыстарды тілге тиек етті. Таяуда Сырға сапарлаған Мемлекет басшысы Қасым-Жомарт Тоқаевтың ел дамуына берген бағасын да жеткізді.
– Жақында Мемлекет басшысы Қасым-Жомарт Кемелұлы Тоқаев Сыр еліне жұмыс сапарымен келіп, «Қорқыт ата» әуежайының жаңа терминалымен танысудан бастап, бірнеше әлеуметтік нысандар мен өндіріс орындарында болды. Мемлекет басшысы Астана мен Алматы қалаларындағыдай тәулік бойы қызмет көрсететін үшінші Президенттік кітапхана Қызылордада ашылатындығын жеткізді. Мұны облыс жұртшылығы үлкен қуанышпен қабыл алды. Президентіміз Сыр өңірінің даму қарқынына, атқарылған жұмыстарға оң бағасын берді.
Биыл облыс бюджеті 851 млрд 300 млн теңгеден асты. Өңірге тартылған инвестиция көлемі 720 млрд теңгеге жетті. Облыста соңғы үш жылда білім беру саласына бөлінген қаржы көлемі 812 млрд 245 млн теңге бөлінді. 5 млрд 700 млн теңгеге 9 мектептің жанынан қосымша ғимараттар бой көтерді. Президент бастамасымен қолға алынған «Келешек мектеп» ұлттық жобасы аясында аймақта 6900 орындық 10 мектеп іске қосылды. Физика-математика бағытындағы «Білім-инновация» лицей-интернаты ашылды. 11 млрд теңгеге «Сыр жұлдыздары» балалар мен жасөспірімдерге арналған шығармашылық-инновациялық академиясы пайдалануға берілді. «ҚазМұнайгаз» ҰК демеушілігімен Қызылорда қаласында 2 млрд 500 млн теңгеге заманауи үлгідегі оқушылар сарайы ашылды. Демеушілікпен 4 млрд 800 млн теңгеге музыкалық колледждің жаңа 450 орындық оқу ғимараты мен 200 орындық жатақханасы өнерлі өрендердің игілігіне табысталды. Облыс орталығында 5 млрд 200 млн теңгеге кәсіптік білім беру және жұмысшы мамандықтардың «құзыреттілік орталығы» ғимаратының құрылысы басталды. Президенттің Катар еліне жасаған жұмыс сапары аясында Оңтүстік өңірлерде электр энергиясының тапшылығын болдырмау мақсатында қуаттылығы 1100 МВт, құны 892 млрд. теңгеге бу-газ қондырғысы аудан аумағында салынатын болады. Бұл мегажоба біздің аудан үшін өте маңызды. Жоба толық іске асқанда, аудан экономикасының дамуына үлкен серпін береді, – деді Берік Әбдіғаппарұлы.
Кездесулерде елді мекен тұрғындары инфрақұрылымдық, кәсіпкерлік және басқа салаларға қатысты ұсыныс-пікірлерін жеткізді. Аудан әкімі барлық ұсыныс бақылауда болып, тиісті жұмыстар атқарылатынын айтты.
Айта кетейік, Сырдария ауданының әкімі Берік Сәрменбаевтың есепті кездесуі 14 қарашада Бесарық, Қоғалыкөл және Шіркейлі ауылдарында жалғаспақ.
«QYRDAN-ақпарат»